Fransa İsraildəki səfirliyini Qüdsə köçürməyəcək
Bakı, 15 may, AZƏRTAC
Fransa hökuməti İsraildəki səfirliyini Qüdsə köçürməyə hazırlaşmır.
AZƏRTAC TASS informasiya agentliyinə istinadla xəbər verir ki, bunu Fransa hökumətinin rəsmi nümayəndəsi Benjamen Qrivo mayın 15-də BFM-TV telekanalının efirində çıxışı zamanı deyib. Onun sözlərinə görə, Fransa öz səfirliyini Təl-Əvivdən Qüdsə köçürməyi planlaşdırmır. “O hazırda harada yerləşirsə, orada da qalacaq”, - deyə Qrivo təsdiqləyib.
Siyasətçi ölkəsinin Yaxın Şərqdə yeni gərginlik ocağının yaradılmasına qarşı olduğunu qeyd edib. Fransa hökumətinin əvvəllər də Donald Trampın ABŞ diplomatik nümayəndəliyinin Qüdsə köçürmək qərarına neqativ yanaşdığını bildirən Qrivo, habelə Parisin yəhudi və ərəb ölkələrinin Qüdsdəki hüquqları barədə mövqeyini xatırladıb: “Fransa bu ərazidə ümumi paytaxta malik iki dövlətin mövcudluğunun tərəfdarıdır. Bu, bizim daimi mövqeyimizdir”, - deyə hökumət nümayəndəsi vurğulayıb.
Qrivo Fransa Prezidenti Emmanuel Makronun öz bəyanatında fələstinli etirazçılara qarşı zorakılıq hallarını qınadığını da diqqətə çatdırıb.
Qeyd edək ki, son məlumata əsasən İsrail ordusunun Qəzza sektorunda hərbi güc işlətməsi nəticəsində həlak olan fələstinlilərin sayı 59 nəfərə çatıb, 2,7 min nəfər isə xəsarət alıb. Onlardan 1359-u odlu silahdan açılan atəş nəticəsində yaralanıb.
Bölmənin digər xəbərləri
