FRANSADA BUİLKİ GÖRÜNMƏMİŞ QIZMAR YAYDA YEGANƏ SEVİNDİRİCİ HAL
Son yüz ildə görünməmiş istilər Fransaya böyük ziyan vurmuşdur. Ölkədə 2,5 milyon toyuq-cücə, taxıl zəmilərinin təxminən 20 faizi tələf olmuşdur. Çaylarda və süni göllərdə balıqlar kütləvi surətdə qırılır. Meyvə-tərəvəzin qiyməti 4 dəfədən çox qalxmışdır. İstidən ölənlər də az deyildir. Məsələn, Təcili Tibbi Yardım Həkimləri Assosiasiyasının məlumatına görə, Fransada 100 adam istilərin qurbanı olmuşdur. Onların əksəriyyəti qocalar və ürək-damar xəstəliklərindən əziyyət çəkənlərdir.
Lakin “şər deməsən, xeyir gəlməz” deyiblər. Belə ki, istilərin, hər halda, xeyri də olmuşdur. Fransanın öz şərabları ilə dünyada məşhur olan Bojole bölgəsində üzüm üç həftə tez yetişmiş və artıq məhsul yığımına başlanmışdır. Bu isə Fransanın müasir tarixində görünməmiş haldır. Mütəxəssislər deyirlər ki, builki şərab çox yaxşı olacaq və keyfiyyətinə görə, 1947-ci ilin misilsiz sayılan şərabını kölgədə qoyacaqdır.
Bölmənin digər xəbərləri
