DÜNYA
Fransada təcrid olma rejimindən çıxmağa dair milli plan Senatda dinlənilib
Paris, 5 may, AZƏRTAC
Təcrid olma rejiminin vacibliyi, təcililiyi əsaslandırıldı, ancaq bu rejimin sosial, iqtisadi və insan dəyərləri son dərəcə böyük oldu. Təcrid olma rejimindən əziyyət çəkənlərə etimadımı bildirirəm.
AZƏRTAC xəbər verir ki, bu sözləri Fransa Baş Naziri Eduard Filip hökumətin təcrid olma rejimindən çıxmaqla bağlı milli planını Senatda təqdim edərkən deyib.
Baş Nazir gənclərlə bağlı bildirib ki, iyunun ortalarından 25 yaşdan aşağı olan, işini, stajını itirmiş, eləcə də təcrid olma rejiminə görə evlərinə qayıda bilməyən tələbələrə 200 avro yardım göstəriləcək. Belə tələbələrin sayı 800 min olduğu göstərilib. Təcrid olma rejimindən çıxmağın müvəffəqiyyəti test etmək imkanından və COVİD-19 virusuna yoluxanların təcrid edilmə imkanına əsaslandığı qeyd edilib.
Baş Nazir xatırladıb ki, elmi şuranın epidemioloji proqnozları mayın 11-dək davam edəcək təcrid olma rejiminə ciddi riayət edilməsi əsasında formalaşıb. Göstərilən tarixədək təcrid olma rejiminə riayət edilməsə COVID-19 virusuna yoluxanların sayı arta bilər. Buna görə də mayın 11-dək təcrid olma rejiminə ciddi riayət edilməlidir.
E. Filip bildirib ki, məktəblər tədricən və könüllülük prinsipi əsasında açılmalıdır. Təhsil işçilərinə və kollec şagirdlərinə maskalar paylanacağı diqqətə çatdırılıb. Ancaq ibtidai sinif şagirdlərinə və uşaq bağçalarında maska taxmaq məcburi olmayacaq.
Baş Nazir iqtisadiyyatın dirçəldilməsinin vacibliyini xüsusi qeyd edib. Bununla bağlı göstərişlərin hazırlanmaqda olduğu deyilib.
Bildirilib ki, ölkənin təcrid olma rejimindən çıxmasına dair xəritə hər gün təqdim olunacaq. Regionlarda epidemiyanın yayılma dərəcəsinə görə xəritədə regionlar 3-yaşıl, narıncı və qırmızı rəngdə göstəriləcək və regionda vəziyyətin dəyişməsi ilə əlaqədar rənglər də dəyişəcək.
Təcrid olma rejimindən çıxmaqla bağlı milli plan Senatda dinləmədən sonra səsə qoyulacaq.
Qeyd edək ki, hökumətin təcrid olma rejimindən çıxmaqla bağlı milli planı Milli Assambleyada təqdim olunanda, müfəssəl hesab edilməsə də qəbul olunub. 368 deputatdan 100-ü əleyhinə və 103 nəfəri isə səs verməyib
Şəhla Ağalarova
AZƏRTAC-ın xüsusi müxbiri
Paris