MƏDƏNİYYƏT
GƏMİDƏ MUZEY AÇILMIŞDIR
Yazıçı və dramaturq Əli Səmədlinin təşəbbüsü ilə Azərbaycan Respublikası Hərbi Dəniz Qüvvələrinin “Göyçay” hərbi gəmisində “Göyçay” muzeyi yaradılmışdır. Muzeydə ilk nəzərə çarpan bu rayonun xəritəsi oldu. Xəritəyə baxan hər bir tamaşaçı Göyçayın kəndləri və ərazisi barədə ətraflı məlumat ala bilər. Muzeydə Göyçayın yetirməsi olan Sovet İttifaqı Qəhrəmanlarının, generalların, bir sıra görkəmli ədəbiyyat və incəsənət xadımlərinin səliqə ilə çərçivəyə salınmış şəkilləri, iki yüzdən artıq bədii və elmi ədəbiyyat vardır. Göyçayın görməli yerlərinin də fotoşəkilləri tamaşaçılarda xoş təəssürat oyadır. Açılış mərasimində Azərbaycan Hərbi Dəniz Qüvvələrinin komandanı, kontr-admiral Şahin Sultanov, 1-ci dərəcəli kapitan Rakif Hüseynov çıxış edərək iştirakçıları, o cümlədən Göyçay rayon ictimaiyyətinin nümayəndələrini salamladılar, muzeyin təşkili ilə bağlı bu xeyirxah işdə əməyi olanlara, xüsusən onun təşəbbüskarı Əli Səmədliyə öz təşəkkürlərini bildirdilər. Qeyd olundu ki, bu muzey Hərbi Dəniz Qüvvələrinin ictimaiyyətlə əlaqələrinin möhkəmləndirilməsində mühüm addımlardan biridir. Azərbaycanın ictimai-siyasi və mədəni həyatında xüsusi xidmətləri olan Göyçayın görkəmli adamları barədə danışan Əli Səmədli bildirdi ki, o, muzeyin eksponatlarla zənginləşməsində bundan sonra da öz köməyini əsirgəməyəcəkdir. Axırda Əli Səmədli göyçaylılar adından gəminin xatirə kitabına ürək sözlərini yazdı.