“Gənc qızların təhsilinə dəstək” layihəsi çərçivəsində növbəti təqaüd proqramı təqdim edilib
Bakı, 11 oktyabr, AZƏRTAC
Oktyabrın 11-də “Gənc qızların təhsilinə dəstək” layihəsi çərçivəsində “Hənifə Məlikova-Zərdabi adına təqaüd proqramı-2023”ün təqdimat mərasimi keçirilib.
AZƏRTAC xəbər verir ki, təqaüd proqramı Ailə, Qadın və Uşaq Problemləri üzrə Dövlət Komitəsinin (AQUPDK), Elm və Təhsil Nazirliyinin, Təhsilin İnkişafı Fondunun birgə əməkdaşlığı ilə ərsəyə gəlib. Layihənin həyata keçirilməsində məqsəd cəmiyyətin diqqətini qızların təhsilinə cəlb etmək, xüsusilə onların müasir təhsil imkanlarından faydalanmasına dəstək olmaqdır.
Təqdimat mərasimi Azərbaycan Respublikasının Dövlət Himninin səsləndirilməsi ilə başlanıb və ardınca layihəyə həsr olunmuş videoçarx nümayiş edilib.
Tədbiri açan Ailə, Qadın və Uşaq Problemləri üzrə Dövlət Komitəsinin sədri Bahar Muradova layihənin artıq üç ildir ki, həyata keçirildiyini deyib. Komitə sədri layihənin gələcəyin qurucuları kimi qalib Azərbaycan gənclərinin savadlı, hüquqlarını və öhdəliklərini bilən şəxsiyyət kimi formalaşmasına töhfə verdiyini vurğulayıb. O, qızların təhsilinə dəstək çağırışına ilk olaraq qadın sahibkarların səs verdiyini, daha sonra bu sıraya digər iş adamlarının, müxtəlif qurumların qoşulduğunu qeyd edərək, bu istiqamətdə səmərəli işlər görüldüyünü diqqətə çatdırıb.
B. Muradova qalib Azərbaycanın vətəndaşları kimi gənclərimizin savadlı və peşəkar olmalarının vacibliyini vurğulayıb. O, Ulu Öndər Heydər Əliyevin müəyyənləşdirdiyi yolu davam etdirən Müzəffər Ali Baş Komandan İlham Əliyevin müdrik siyasəti ilə ərazilərimizin tam suverenliyinin təmin olunması ilə Azərbaycanın dünyaya yeni bir nümunə sərgilədiyini diqqətə çatdırıb.
Ötən il rəhbərlik etdiyi dövlət komitəsi ilə Elm və Təhsil Nazirliyi arasında niyyət protokolunun imzalandığını xatırlayan B.Muradova Təhsilin İnkişafı Fondu ilə də fəaliyyət planının imzalandığını bildirib.
Azərbaycan qadını və təhsil mövzusuna toxunan elm və təhsil naziri Emin Əmrullayev qeyd edib ki, bir çox sahədə olduğu kimi, bu sahədə də ilklərə imza atan ölkə kimi Azərbaycan istər Şərq, istərsə də digər müsəlman ölkələri sırasında xüsusi yer tutur. Maarifçilik və xeyriyyəçilik ənənələrimizdən bəhs edən nazir Şərqdə ilk qızlar məktəbinin ölkəmizdə fəaliyyətə başlamasını xalqımız üçün böyük dəyərlərdən biri kimi qiymətləndirib. Təqaüd proqramlarının əhəmiyyətindən söz açan nazir bildirib ki, bu proqramın şəffaflaşması və institutlaşması vacib məsələlərdəndir. O, üç ili tamam olan bu layihənin qızların təhsilinə, gələcək inkişafına töhfə baxımından vacib və simvolik rol oynadığını qeyd edib.
E.Əmrullayev qızların təhsilə cəlb edilməsi və bu prosesə dəstək göstərilməsinin prioritet vəzifələrdən olduğunu vurğulayıb, qadınların təhsilli, geniş dünyagörüşlü olmasının uşaq və gənclərimizin də nümunəvi tərbiyə və təhsilinin formalaşmasına səbəb olacağını bildirib.
Milli Məclisin Elm və təhsil komitəsinin sədri Bəxtiyar Əliyev təqaüd alan gəncləri təbrik edərək, bu gözəl təşəbbüsə dəstək göstərənlərin sayının artmasını önəmli olduğunu bildirib. Növbəti illərdə sayın daha da artacağına inamını ifadə edən komitə sədri vurğulayıb ki, bu gözəl təşəbbüsə bütün təşkilat və sahibkarların qoşulması, dəstək göstərənlərin sayının çoxalması önəmlidir.
“Hənifə Məlikova - Zərdabi adına təqaüd proqramı”nın bir ilinin tamam olduğunu bildirən Təhsilin İnkişafı Fondunun İdarə Heyətinin sədri Elnur Nəsibov təqaüd alan qızların əksəriyyətinin yüksək bal topladıqlarını bildirib. Fondun bu günədək həyata keçirdiyi layihələrdən, təqaüd proqramlarından söz açan E.Nəsibov, bu sahədə əməkdaşlıqların genişləndirildiyini, yeni qurum və təşkilatların bu işə cəlb olduğunu vurğulayıb.
Çıxışlar dinlənildikdən sonra layihəyə dəstək göstərən təşkilatlara - “BP”, “Neqsol Holding”, “İnci Group” və Azərbaycan Həmkarlar İttifaqları Konfederasiyasına təşəkkürnamələr, dəstək göstəriləcək 54 tələbəyə isə sertifikat təqdim edilib.
Tədbir bədii hissə ilə davam edib.
Qeyd edək ki, indiyədək layihə çərçivəsində 93 nəfər gənc qıza təhsildə dəstək göstərilib.
Bölmənin digər xəbərləri
