Gəncədə “Birlikdə diabetə qalib gələk” mövzusunda maarifləndirici seminar keçirilmişdir
Gəncə, 18 iyun (AZƏRTAC, Sabir Əliyev). Gəncə şəhərindəki endokrinoloji xəstəxanada “Birlikdə diabetə qalib gələk” mövzusunda maarifləndirici seminar keçirilmişdir.
AZƏRTAC xəbər verir ki, şəkərli diabet xəstələrinin, eləcə də ictimaiyyət nümayəndələrinin iştirakı ilə keçirilən seminarda tanınmış endokrinoloq həkimlər- tibb üzrə fəlsəfə doktoru Gündüz Əhmədov və Sofiya Piriyeva çıxış edərək məsləhət və tövsiyələrini vermişlər.
Bildirilmişdir ki, hazırda respublikamızda 200 mindən artıq şəkərli diabet xəstəsi vardır və onlardan 1000 nəfəri uşaqlardır. Məsləhət verilmişdir ki, bütün sahə həkimləri, xüsusilə pediatrlar uşaqlarda şübhəli bir şey hiss etdikdə onun müayinəsini təmin etməlidirlər. Hər bir sakinin, eləcə də valideynin müntəzəm olaraq tibbi müayinədən keçməsinin vacibliyini diqqətə çatdıran həkimlər bu sahədə tövsiyələrini verərək demişlər ki, unutmaq olmaz ki, vaxtında aşkar edilmiş şəkərli diabet xəstəliyinin qarşısını almaq mümkündür.
Bölmənin digər xəbərləri
