GƏNCƏDƏ GƏNCLƏRİN ÜMUMŞƏHƏR TOPLANTISI KEÇİRİLMİŞDİR
AZƏRTAC xəbər verir ki, Gəncədə gənclərin ümumşəhər toplantısı keçirilmişdir.
Gənclər və idman naziri Azad Rəhimovun iştirakı ilə keçirilən tədbirdən əvvəl Gəncənin Heydər Əliyev prospektində yaradılmış nümunəvi məhəllənin açılışı olmuşdur. Məhəllədəki fəvvarə, idman meydançaları, yaşıllıqlar, işıqlandırma avadanlıqları mərasim iştirakçıları tərəfindən maraqla qarşılanmışdır. Elə buradaca məhəllələrarası mini futbol turnirinə start verilmış və 50-dən artıq komandanın iştirak etdiyi yarışın bayrağı qaldırılmışdır.
Ümummilli liderimiz Heydər Əliyevin abidəsi ziyarət edildikdən sonra Gəncə Şəhər İcra Hakimiyyətinin iclas salonunda gənclərin ümumşəhər toplantısı öz işinə başlamışdır.
Toplantını şəhər İcra hakimiyyətinin başçısı Eldar Əzizov açaraq belə bir tədbirin keçirilməsini şəhərin ictimai-siyasi həyatında əlamətdar hadisə kimi qiymətləndirmiş və əsası ümummilli liderimiz Heydər Əliyev tərəfindən qoyulan və Prezident İlham Əliyev tərəfindən daha da təkmilləşdirilən dövlət gənclər siyasətinin təntənəsi kimi dəyərləndirmişdir.
Sonra Gəncə Şəhər Gənclər və İdman Baş İdarəsinin rəisi Möhsüm Hüseynovun gəncəli gənclərin şəhərin və eləcə də respublikamızın ictimai-siyasi həyatında rolundan bəhs edən məruzəsi dinlənilmişdir.
Məruzə ətrafında YAP Gəncə şəhər təşkilatı gənclər birliyinin sədri Ramil İbrahimov, Gəncə Dövlət Universitetinin 3-cü kurs tələbəsi Elnur Həsənov,”Gələcəyə körpü” Gənclər İctimai Birliyinin sədri Müşfiq Cəfərov, gənc sahibkar Lalə Abdullayeva və başqaları çıxış edərək son illər bölgədə irimiqyaslı layihələrin həyata keçirilməsi nəticəsində Azərbaycanda qazanılan iqtisadi uğurlardan danışmışlar.
Salonda qoyulmuş mikrofonlar vasitəsilə gənclərin söylədikləri fikirlər, qaldırdıqları məsələlər toplantının daha iişgüzar keçməsinə səbəb olmuşdur.
Toplantıda gənclər və idman naziri Azad Rəhimov geniş nitq söyləmişdir. O, ölkəmizdə sağlam düşüncəli və əsl vətənpərvər ruhda böyüyən gənclərimizin dövlət qayğısı ilə əhatə olunmalarından danışmışdır. Nazir bu qayğıya çalışdıqları sahələrdə qazandıqları uğurlarla cavab verən gənclərimizə bundan sonrakı fəaliyyətlərində də nailiyyətlər qazanmağı arzulamışdır.
Sonra bu ilin oktyabrında Bakıda keçiriləcək Azərbaycan gənclərinin 5-ci respublika forumuna nümayəndələr seçilmişdir.
Axırda toplantı iştirakçıları adından ölkə başçısı İlham Əliyevə müraciət qəbul olunmuşdur.
