GƏNCƏDƏ “SOS UŞAQ KƏNDİNİN DOSTLARI” KLUBU FƏALİYYƏTƏ BAŞLAMIŞDIR
2006-ci ildən fəaliyyətə başlayan və hazırda 43 uşağın yaşadığı Gəncə Sos Uşaq Kəndində yeni “Sos Uşaq Kəndinin Dostları” klubu yaradılmışdır.
Kəndin rəhbəri Nəsimi Ələkbərli AZƏRTAC-a demişdir ki, klubun yaradılmasından məqsəd dövlət və qeyri-hökumət təşkilatları rəhbərlərinin diqqətini qarşıya çıxan problemlərin həllinə kəndə yönəltməkdir. Bunun üçün xüsusi fond da yaradılmışdır. Həmin fonda yığılan vəsaitin kənd sakinlərinin yay istirahətlərinə, ciddi müalicəyə ehtiyacı olan sakinlərin sağlamlığının qorunmasına və eləcə də digər problemlərin həllinə yönəldilməsi nəzərdə tutulmuşdur. Yığılan vəsaitin hansı sahəyə xərclənməsi yalnız klub üzvlərinin yekdil qərarı ilə həyata keçirilə bilər ki, bu da şəffaflıq üçün əsas amildir.
