SİYASƏT
Gəncədə Türkiyə Cümhuriyyətinin banisi Mustafa Kamal Atatürkün xatirəsi anılmışdır
Gəncə, 11 noyabr (AZƏRTAC). Türkiyə Cümhuriyyətinin banisi Mustafa Kamal Paşa Atatürkün vəfatının 75 ildönümü Gəncədə keçirilən anım mərasimi ilə qeyd edilmişdir.
AZƏRTAC xəbər verir ki, anım mərasimi Türk dünyasının böyük oğlunun vəfat etdiyi an, səhər saat 9-05-də bir dəqiqəlik sükutla başlamışdır. Sonra böyük öndərin həyat və fəaliyyətindən bəhs edən sənədli filmin nümayişi ilə davam etdirilmişdir. Mustafa Kamal Atatürkün dağılmaqda olan Osmanlı imperiyası üzərində qurduğu Türkiyə Respublikasından, eləcə də onun sosial-iqtisadi, mədəni sahələrdə apardığı islahatlardan bəhs edən film iştirakçılar tərəfindən maraqla qarşılanmışdır.
Türkiyənin Gəncədəki baş konsulu Haluk Ağca tədbiri açaraq təmsil etdiyi ölkənin keçən dövr ərzində qazandığı uğurlar barədə məruzə ilə çıxış etmişdir.
Anım mərasimində şəhər ictimaiyyətinin nümayəndələri və Gəncədə yaşayan və fəaliyyət göstərən Türkiyə vətəndaşları iştirak etmişlər.