Gənclər Kitabxanasında Xalq şairi Süleyman Rüstəmin xatirəsi anılıb
Bakı, 12 mart, AZƏRTAC
Bu il Xalq şairi, görkəmli ictimai xadim, dramaturq Süleyman Rüstəmin anadan olmasının 120 illiyi tamam olur. Bu münasibətlə Cəfər Cabbarlı adına Respublika Gənclər Kitabxanasında görkəmli dramaturqun mənalı həyat yolu və zəngin ədəbi irsindən bəhs edən elektron məlumat bazası hazırlanıb.
Kitabxanadan AZƏRTAC-a bildirilib ki, özündə 20-dən çox bölməni cəmləyən bazada rəsmi sənədlərlə yanaşı Ulu Öndər Heydər Əliyevin Xalq şairi Süleyman Rüstəmin anadan olmasının 90 illiyi münasibətilə təntənəli yubiley gecəsində söylədiyi nitqin tam mətni təqdim edilir. Elektron bazada filologiya elmləri doktoru, Əməkdar mədəniyyət işçisi Vaqif Yusiflinin “Süleyman Rüstəmin qəlbi Azərbaycandan ayrılmaz” adlı məqaləsi, bir sıra görkəmli şəxslərin ədib haqqında söylədikləri dəyərli fikirlər, Süleyman Rüstəmin layiq görüldüyü mükafatlar, yaradıcılıq nümunələri yer alır. Kitabxana əməkdaşları tərəfindən hazırlanan bazada Süleyman Rüstəmin müəllifi olduğu, redaktə və tərtib etdiyi, “Ön söz” yazdığı Azərbaycan və rus dillərində nəşr edilən kitabları, məqalələri, tərcümələri ilə yanaşı, görkəmli dramaturq haqqında qələmə alınan əsərlərin, dövrü mətbuat nümunələrinin siyahısı da təqdim olunur.
Elektron məlumat bazasında “Notlar”, “İzonəşrlər”, “Xatirəsinin əbədiləşdirilməsi”, “Filmoqrafiya”, “Virtual kitab sərgisi”, “Foto və videoqalereya” bölmələri də mövcuddur.
“Xalq şairi Süleyman Rüstəm 120” adlı elektron məlumat bazası kitabxananın rəsmi saytında yerləşdirilib.
Bölmənin digər xəbərləri
