Gitanas Nauseda: Miqrasiya böhranının həllində ciddi irəliləyiş olsa da,problem tam aradan qaldırılmayıb
Vilnüs, 12 avqust, AZƏRTAC
Gəlin qarşımıza bir nömrəli vəzifə qoyaq. Milli təhlükəsizlik, sərhəd mühafizəsi, daxili əmin-amanlıq ən vacib məsələlərdir və biz bu məsələləri həll etməliyik. Dövlət də sözügedən məsələlərin uğurla həll edilməsi üçün bütün qüvvəsini sərf edəcək. Mən artıq bu sahədə əldə edilmiş ciddi irəliləyiş görürəm.
AZƏRTAC Litva mətbuatına istinadla xəbər verir ki, bu sözləri ölkə Prezidenti Gitanas Nauseda Mitskunay şəhərinə səfəri zamanı jurnalistlərə müsahibəsində söyləyib.
Litva Prezidenti miqrasiya böhranının həllində ciddi irəliləyişin olduğunu bildirib. Lakin o qeyd edib ki, böhran hələ də tam aradan qaldırılmayıb.
“Şübhə etmirəm ki, bir neçə ay əvvəl olduğu kimi, əngəl çıxarmaq üçün vəziyyətin daha da mürəkkəbləşməsinə cəhd ediləcək. Lakin biz buna qarşı müqavimət göstərəcəyik və rejim bunu yaxşı anlamalıdır”, - deyə Litvanın dövlət başçısı əlavə edib.
Qeyd olunub ki, Prezident Gitanas Nauseda Litvanın və Avropa İttifaqının xarici sərhədini qoruyan sərhədçilərə minnətdarlığını bildirmək üçün Mitskunay şəhərinə səfər edib.
Asiman Əsədov
AZƏRTAC-ın xüsusi müxbiri
Vilnüs
Bölmənin digər xəbərləri
