GÖRKƏMLİ FRANSIZ ƏDİBLƏRİNİN XATİRƏSİ YAD EDİLMİŞDİR
Azərbaycan Yazıçılar Birliyində fransız və dünya ədəbiyyatının klassikləri Viktor Hüqonun və Aleksandr Dümanın (Ata) 200 illiyi qeyd edilmişdir.
Yazıçılar Birliyinin sədri, xalq yazıçısı, Milli Məclisin deputatı Anar tədbiri açaraq, görkəmli ədiblərin yaradıcılığından danışdı, müasirliyini itirməyən əsərlərinin bir çox dillərə, o cümlədən Azərbaycan dilinə tərcümə edildiyini bildirdi.
Xalq şairi, Milli Məclisin deputatı Vaqif Səmədoğlu, Azərbaycan-Fransa Dostluq Cəmiyyətinin baş katibi Ramiz Abutalıbov, Yazıçılar Birliyinin katibi Çingiz Abdullayev, kinorejissor, əməkdar incəsənət xadimi Gülbəniz Əzimzadə, professor Qəzənfər Paşayev, yazıçı-publisist Hamlet Qoca, Mədəniyyət və İncəsənət Universitetinin professoru Həsən Quliyev və başqaları çıxış edərək, zəngin fransız ədəbiyyatından, xüsusilə dünya mədəniyyəti xəzinəsinə böyük töhfələr vermiş V.Hüqonun və A.Dümanın çoxsaylı yaradıcılığından danışdılar. Eyni zamanda, A.Dümanın “Qafqaz” əsərində Azərbaycanla bağlı məqamları xatırladılar.
Fransanın Bakıdakı səfirliyinin mədəniyyət və əməkdaşlıq üzrə müşaviri İv Bertran Azərbaycanda fransız ədəbiyyatına və mədəniyyətinə böyük maraq olmasından məmnun qaldığını bildirdi, Fransada da Azərbaycan ədəbiyyatının tədqiq edildiyini vurğuladı.
Bölmənin digər xəbərləri
