GÖYÇAYDA HEYVANDARLIQ MƏHSULLARININ İSTEHSALINA DİQQƏT ARTIRILIR
AZƏRTAC xəbər verir ki, Göyçay rayonunda heyvandarlıq məhsulları istehsalının artırılmasında fərdi təsərrüfatlarla yanaşı, kəndli-fermer təsərrüfatları da xüsusi rola malikdir. “Ceyhun”, “Rəvan”, “Qızılbular”, “Asiman” kəndli-fermer təsərrüfatları son vaxtlar rayonda ət və süd məhsullarının istehsalında əsaslı dönüş yaratmışlar.
Regionların sosial-iqtisadi inkişafı Dövlət Proqramına uyğun olaraq bu ilin 9 ayı ərzində Göyçayda mal-qaranın cins tərkibinin yaxşılaşdırılması üçün əməli tədbirlər görülmüş, qaramalın xüsusi çəkisinin yüksəldilməsinə diqqət artırılmışdır.
Rayon icra hakimiyyətinin aqrar şöbəsindən bildirmişlər ki, bu müddətdə iribuynuzlu mal-qaranın sayı 46.192 başa çatdırılmışdır. Bu da ötən ilin müvafiq dövründəkindən 429 baş çoxdur. Davarların sayı isə 2.315 baş artaraq 60.754 olmuşdur. Ümumiyyətlə, ötən ilin müvafiq dövrünə nisbətən cari ilin 9 ayı ərzində ət (diri çəkidə) istehsalı 54 ton artaraq 5.104 ton, süd istehsalı 202 ton çoxalaraq 17.272 ton, yun istehsalı 1,3 ton artaraq 77,8 ton təşkil etmişdir.
Bölmənin digər xəbərləri
