GÖYÇAYDA NAR YIĞIMINA BAŞLANMIŞDIR
Göyçay bağlarında nar yığımına başlanmışdır. Məlumdur ki, Azərbaycanda bu meyvənin ən yaxşı sortları məhz Göyçayda yetişir.
Göyçay Rayon İcra Hakimiyyəti başçısının müavini Ədalət Dövlətov AZƏRTAC-a bildirmişdir ki, ötən il burada 23 min ton nar tədarük edilmişdi. Bu mövsümdə isə 40 min ton məhsul yığmaq planlaşdırılır.
Ekspertlərin sözlərinə görə, əlverilşli torpaq-iqlim şəraiti bu regionda nar ağaclarını elə bir əziyyət olmadan yetişdirməyə imkan verir. Göyçayda son vaxtlar nar bağlarının sahəsi 1.500 hektaradək genişləndirilmişdir. Ən geniş yayılmış nar sortları gülöyşə, şıxbabı və vələsdir.
Bu dadlı meyvələrin respublika üzrə ümumi yığımı ildə orta hesabla 112 min ton təşkil edir. Bu il isə azı 120 min ton nar yığmaq nəzərdə tutulmuşdur.
Ölkəmizdə nar emalı ilə dörd müəssisə məşğul olur. Müalicəvi əhəmiyyəti olan nar əsasən Rusiyaya, Ukraynaya və digər MDB ölkələrinə, habelə Avropaya göndərilir. Bir sözlə, narçılıq rayonda gəlirli sahəyə çevrilmişdir.
Hər il Mədəniyyət və Turizm Nazirliyi Göyçay İcra Hakimiyyəti ilə birlikdə rayonda nar bayramı təşkil edir.
Bölmənin digər xəbərləri
