GÖYÇAYDA YAZ TARLA İŞLƏRİNƏ HAZIRLIQ GÖRÜLÜR
Göyçay rayonunda iqtisadiyyatın əsas hissəsini aqrar sahə - əkinçilik, meyvəçilik və maldarlıq təşkil edir. Hazırda rayonda yaz tarla işlərinə hazırlıq görülür. Havanın bir müddət yağmurlu və şaxtalı keçməsi əkin sahələri üçün çox xeyirli olmuş, bol məhsul üçün zəmin yaratmışdır.
Rayon icra hakimiyyətinin aqrar şöbəsindən AZƏRTAC-ın müxbirinə bildirmişlər ki, torpaq mülkiyyətçiləri payız aylarında taxıl səpinindən əvvəl şum altına 340 ton mineral gübrə vermişlər. Bu günlərdə sahələrə azot gübrəsi də səpiləcəkdir. Rayona “Aqrolizinq” ASC-nin xətti ilə kifayət qədər mineral gübrə gətirilmişdir. Sahibkarlar dəyərinin 50 faizini ödəməklə həmin gübrələrdən lazımi qədər alıb istifadə edə biləcəklər.
Bundan əlavə, vətəndaşlar fərdi həyətyanı sahələrində və mülkiyyətlərində olan pay torpaqlarının bir hissəsində faraş tərəvəzçiliklə də məşğul olurlar. Bu iş rayonun Qaraman, Çayarxı, Ləkçılpaq, Mırtı, Hacalıkənd, Qarabaqqal, Qaraxıdır kəndlərində geniş yayılmışdır. Bu kəndlərdə elə bir həyətyanı sahə yoxdur ki, orada iki və daha artıq istixana olmasın. Hazırda kəndlərdə istixanaların fəaliyyəti bərpa olunur, orada pomidor və xiyar şitilləri yetişdirilir.
Faraş tərəvəzçiliklə məşğul olanlar ildə 2 dəfə məhsul götürə bilirlər. Ümumiyyətlə, rayonda istehsal olunan tərəvəz məhsullarının yarıdan çoxunu faraş tərəvəz təşkil edir.
Bölmənin digər xəbərləri
