GÖZDƏN ƏLİLLƏR CƏMİYYƏTİ 75 İLLİK YUBİLEYİNİ QEYD ETMİŞDİR
Tədbirdə dövlət himni səsləndirilmişdir.
Cəmiyyətin prezidenti Səmyar Abdullayev ötən illər ərzində təşkilatda baş verən mühüm dəyişikliklərdən, kor və zəifgörən insanlara göstərilən dövlət qayğısından, beynəlxalq təşkilatlarla qurulan sıx əməkdaşlıqdan söz açmışdır. S. Abdullayev məlumat vermişdir ki, 1931-ci ildən fəaliyyət göstərən cəmiyyətin 10 minə yaxın üzvü vardır. Qurum tərəfindən “Masaj reabilitasiya”, Kor və zəifgörən uşaqlar üçün respublika internat məktəbində informasiya texnologiyaları və brayl elektron çap mərkəzləri yaradılmış, həmçinin respublika korlar kitabxanasında kaset və disklərə diktor mətni ilə bədii əsərlər yazılmışdır.
Natiq Heydər Əliyev Fondunun prezidenti, YUNESKO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın əlillərə göstərdiyi diqqət və qayğını da xatırlatmışdır.
Tədbirdə Əmək və Əhalinin Sosial Müdafiəsi, Təhsil, Nəqliyyat, Vergilər nazirliklərinin, Ombudsman aparatının və digər qurumların nümayəndələri çıxış etmişlər.
Natiqlər vurğulamışlar ki, kor və zəifgörən əlillərin problemləri daim öyrənilir və onlara dövlət tərəfindən hərtərəfli qayğı göstərilir.
Tədbirdə Ümumrusiya Korlar Cəmiyyətinin prezidenti, Avropa Korlar Birliyinin vitse-prezidenti Aleksandr Neumıvakin, Türkiyə Korlar Federasiyasının beynəlxalq işlər üzrə vitse-prezidenti Emin Dəmirçi, Litva Kor və Zəifgörənlər Assosiasiyasının vitse-prezidenti Singitas Armonas, İran Dövlət Rifah Təşkilatının fiziki əlillik idarəsinin baş direktoru Kayvan Dəvətgaran Taghipur, Qazaxıstan Korlar Cəmiyyətinin direktoru Baybulat Aubakirov və digər qonaqlar iştirak etmişlər.
Sonda istedadlı cəmiyyət üzvləri maraqlı konsert proqramı ilə çıxış etmişlər.
