GÜCLÜ LEYSAN OGUZUN DAĞ ÇAYLARINDA DAŞQINLARA SƏBƏB OLMUŞDUR
Oğuz Rayon İcra Hakimiyyətindən AZƏRTAC-a bildirmişlər ki, iyulun 7-dən 8-nə keçən gecə yağan güclü leysan rayon ərazisindən axan Əlican və Baş Daşağıl çaylarında daşqınlara səbəb olmuşdur. Nəticədə ətraf kəndləri sel basmış, vətəndaşların şəxsi təsərrüfatlarına, əkin sahələrinə, yollara, rabitə və elektrik xətlərinə xeyli ziyan dəymişdir.
Əlican çayında baş vermiş daşqın nəticəsində çay öz məcrasından çıxmış, Bayan kəndinin ərazisini, habelə Ərmənət, Qumlaq və digər ətraf kəndlərdə əkin sahələrini sel suları basmışdır. Həyata keçirilən operativ tədbirlər nəticəsində çay öz məcrasına qaytarılmışdır.
Sel nəticəsində Xalxal kəndinə gedən yolun üzərindəki 25 metr uzunluğunda körpü dağılmış, kəndlə əlaqə kəsilmişdir. Görülmüş tədbirlər nəticəsində hazırda kəndlə müvəqqəti əlaqə yaradılmışdır.
Baş Daşağıl çayında baş vermiş daşqın nəticəsində sel suları Muxas və Baş Daşağıl kəndlərini rayon mərkəzi ilə birləşdirən yolun xeyli hissəsini yuyaraq sıradan çıxarmışdır.
Hazırda təbii fəlakətin nəticələrinin aradan qaldırılması üçün həmin yaşayış məntəqələrində operativ tədbirlər həyata keçirilir. Çaylarda sahilbərkitmə işlərinin aparılmasına rayonda mövcud olan texnika ilə yanaşı, ətraf rayonlardan gətirilmiş ağır texnika da cəlb edilmişdir. Baş vermiş təbii fəlakətlə bağlı əlaqədar nazirliklər məlumatlandırılmışıar.
Bölmənin digər xəbərləri
