Gürcüstan mətbuatında azərbaycanlı alim Fatimə Hacıyeva haqqında məqalə dərc olunub
Tbilisi, 9 aprel, AZƏRTAC
Gürcüstanın nüfuzlu “Sakartvelos Respublika” qəzetində azərbaycanlı alim, Azərbaycan Respublikası Elmi-Tədqiqat Mama Ginekologiya İnstitutunun Ginekologiya şöbəsinin müdiri, dosent Fatimə Hacıyeva haqqında məqalə dərc olunub.
AZƏRTAC xəbər verir ki, gürcü dilində dərc olunan məqalədə alimin həyat və fəaliyyəti, mama-ginekologiya ilə bağlı tədqiqatları və bu sahədə qabaqcıl təcrübə barədə fikirləri yer alıb.
Məqalədə alimin Azərbaycanda tibb elminin inkişafı, dövlətin bu sahəyə diqqət və qayğısı, tibb sahəsində görülən işlər, aparılan elmi araşdırmalar və onların nəticələri barədə fikirləri də verilib. Bundan başqa, azərbaycanlı alimlərin tibb sahəsində qazandıqları nailiyyətlər və bu uğurların dünya tibb elminə verdiyi töhfələrdən də bəhs olunur.
Qeyd edək ki, F.Hacıyeva 2 dərs vəsaitinin, 60-dan çox elmi məqalənin müəllifidir. İngiltərə, Ukrayna, Danimarka, İsveç, Macarıstan, Hindistan və Türkiyənin nüfuzlu jurnallarında elmi əsərləri nəşr olunub. 2011-ci ildə London şəhərində Elizabeth Queen sarayında keçirilən Mama-ginekoloqların və androloqların IV Böyük Konqresində gənc alimin elmi işinin poster prezentasiyası Qızıl Medala layiq görülüb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
