GÜRCÜSTANDA İKİ XÜSUSİ TƏHLÜKƏLİ CİNAYƏTKAR MƏHV EDİLMİŞDİR
AZƏRTAC-ın müxbiri Tbilisidən xəbər verir ki, Gürcüstan Daxili İşlər Nazirliyinin xüsusi təyinatlı dəstəsinin üzvləri bu yaxınlarda paytaxt həbsxanasından qaçmış iki məhbusu Kutaisi şəhərində yaxalayaraq məhv etmişlər. Daxili işlər naziri Koba Narçemaşvili jurnalistlərə bildirmişdir ki, cinayətkarlar təslim olmaqdan imtina etmiş və polisləri atəşə tutmuşlar. Onlar cavab atəşi ilə öldürülmüşlər. Nazir demişdir ki, cinayətkarlardan avtomatlar, tapança və qumbaralar tapılmışdır. Əldə olan məlumata görə, cinayətkarlar Kutaisiyə bir biznesmeni oğurlamağa gəliblərmiş. Xatırladaq ki, son bir ayda Tbilisidəki Ortacala həbsxanasından və Rustavidəki ciddi rejimli koloniyadan gözətçilərin səhlənkarlığı və köməyi ilə 27 nəfər xüsusi təhlükəli cinayətkar qaçmışdır. Onlardan biri bu günlərdə polislər tərəfindən öldürülmüşdür.
Bölmənin digər xəbərləri
