Gürcüstanda son iki gündə 5 zəlzələ qeydə alınıb
Tbilisi, 19 fevral, AZƏRTAC
Fevralın 19-da Gürcüstanda 3 zəlzələ qeydə alınıb.
AZƏRTAC xəbər verir ki, bu barədə Gürcüstan Milli Seysmoloji Xidmət Mərkəzi məlumat yayıb.
Bildirilir ki, birinci zəlzələ bu gün saat 06:27-də Ozurqeti bələdiyyəsinin Kvaçalati kəndində 3,6 bal gücündə olub. İkinci zəlzələ isə bir qədər sonra Gomismta kurortunda baş verib - 3 bal. Daha bir zəlzələ Çoxatauri bələdiyyəsinin Bukinar kəndində 3,1 bal gücündə qeydə alınıb.
Qeyd edək ki, fevralın 18-də episentri Dmanisi bələdiyyəsinin Məmişlər kəndidə olmaqla, ard-arda 3 bal gücündə iki zəlzələ baş verib.
Son 10 gün ərzində Gürcüstan və Acarıstan MR ərazisində 7 zəlzələ qeydə alınıb.
Məlumat üçün bildirək ki, Gürcüstanda 2022-ci il fevralın 13-də baş vermiş 6,2 bal gücündə zəlzələ nəticəsində 60-dan çox evə və inzibati binaya ciddi ziyan dəymişdi.
Gürcüstanda sonuncu dəfə ən güclü zəlzələ isə 1991-ci ildə Raça və İmereti bölgələrində 7 bal gücündə qeydə alınıb. Zəlzələnin episentrində yeraltı təkanların gücü 9 bal olmuşdu. O zaman 200 nəfər ölmüş, 46 minə yaxın evə və sənaye obyektinə ziyan dəymişdi.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
