HƏRRACLARDA ƏN BÖYÜK ARTIM REPO ƏMƏLİYYATLARI BAZARINDA VƏ NOTLARIN TƏKRAR BAZARINDA QEYDƏ ALINMIŞDIR
AZƏRTAC xəbər verir ki, yanvar-iyun aylarında Bakı Fond Birjasında (BFB) bütün alətlər üzrə bağlanılmış əqdlərin ümumi məbləği 4 milyard 21 min 759 manat təşkil etmişdir. Bu, ötən ilin müvafiq dövrü ilə müqayisədə 267,79 faiz çoxdur. Bütün dövriyyənin 97,87 faizi dövlət qiymətli kağızlarının payına düşmüşdür.
Ümumiyyətlə, həmin müddətdə BFB-də keçirilmiş hərracların nəticələri ötən ilin müvafiq dövrü ilə müqayisədə dövlət qısamüddətli istiqrazlarının yerləşdirilməsi üzrə 147,40 faiz, səhmlərin yerləşdirilməsi üzrə 54,70 faiz, qısamüddətli notların yerləşdirilməsi üzrə 132,46 faiz, repo əməliyyatları üzrə 663,23 faiz, korporativ istiqrazlar (təkrar bazar) üzrə isə 121,73 faiz çox olmuşdur.
Birja fəallığının artımı mütəşəkkil qiymətli kağızlar bazarının bütün seqmentlərində nəzərə çarpmamışdır. Ən böyük artım repo əməliyyatları bazarında və notların təkrar bazarında müşahidə olunmuşdur.
