HEYDƏR ƏLİYEV FONDUNUN AZƏRBAYCAN MƏDƏNİYYƏTİNƏ DAHA BİR TÖHFƏSİ
AZƏRTAC xəbər verir ki, aprelin 11-də Heydər Əliyev Fondunda Azərbaycanın musiqi mədəniyyəti tarixində xüsusi yeri olan xalq artisti, bəstəkar, pianoçu Rafiq Babayevin yaradıcılığını əhatə edən musiqi albomunun təqdimatı olmuşdur. Heydər Əliyev Fondunun hazırladığı bu albom həm də Ermənistanın xüsusi xidmət orqanlarının əli ilə 1994-cü il martın 19-da Bakı metrosunda törədilmiş terror aktının qurbanı olan Rafiq Babayevin simasında erməni təcavüzü və terroru nəticəsində həlak olmuş bütün insanların xatirəsinə həsr edilmişdir.
Layihənin həyata keçirilməsi üçün yaradılmış işçi qrupuna bəstəkarın ailə üzvləri, yaxın həmkarları cəlb olunmuşdular. MDB ölkələrinin və Azərbaycanın dövlət arxivlərindən toplanmış materiallar əsasında hazırlanmış alboma Rafiq Babayevin həyat və yaradıcılığından bəhs edən və yüksək poliqrafik səviyyədə buraxılmış kitab, nadir videoyazılar olan 2 DVD və onun əsərlərindən ibarət 8 CD daxildir. Disklər “SONY” firmasının Avstriyadakı studiyasında müasir texnologiya əsasında təmizlənərək yazılmışdır.
Azərbaycan mədəniyyət və incəsənət xadimlərinin, rəsmi şəxslərin iştirak etdikləri təqdimat mərasimi Rafiq Babayevə həsr olunmuş filmin nümayişi ilə başlandı.
Layihənin təşəbbüsçüsü, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı MEHRİBAN ƏLİYEVA mərasimi açaraq dedi:
- Hörmətli qonaqlar, əziz dostlar!
Mən sizin hamınızı Heydər Əliyev Fondunda ürəkdən salamlayıram. Bu gün biz görkəmli incəsənət xadimi, musiqiçi, bəstəkar, xalq artisti Rafiq Babayevin yaradıcılığına həsr olunmuş musiqi albomunun təqdimat mərasiminə yığışmışıq.
Heydər Əliyev Fondu tərəfindən hazırlanmış bu alboma sənətkarın həyat və yaradıcılığından bəhs edən kitab, seçilmiş əsərlərindən ibarət olan 8 musiqi diski və video materialları əks etdirən 2 DVD daxildir.
Rafiq Babayev XX əsrin 60-70-ci illərində musiqi aləminə yeni nəfəs, fərqli baxış gətirən sənətkar kimi tanınır. O, milli musiqi köklərinə bağlı olaraq, Qərb və Şərq musiqi ənənələrinin sintezinin, muğam və xalq melodiyalarının caz ritmləri ilə birləşdirilməsinin əsasını qoymuş musiqi novatorlarından biri idi. Onun çoxsaylı caz, fortepiano, estrada əsərləri, pyes və mahnıları nəinki Azərbaycanda, hətta xaricdə də çox yaxşı tanınır.
Çox təəssüf ki, belə bir insanın yarı yolda kəsilən ömrü onun bir çox arzularını ürəyində qoydu. 1994-cü ilin mart ayında Bakı metrosunda törədilən erməni terroru nəticəsində Rafiq Babayev faciəli şəkildə həlak oldu, mədəniyyətimizə böyük itki üz verdi. Bu terror aktı nəticəsində 14 nəfər həlak olmuş, 49 nəfər yaralanmışdır. Bütövlükdə, 1990-cı illərin əvvəlində erməni terror təşkilatları tərəfindən ölkəmizdə 32 terror aktı törədilmiş, 2 mindən çox insan bunların qurbanı olmuşdur. Bu gün bu albomu təqdim edərək, biz təkcə Rafiq Babayevin xatirəsini deyil, bütün erməni terrorunun qurbanı olmuş günahsız insanların ruhunu yad edirik.
Heydər Əliyev Fondu Ermənistanın Azərbaycana qarşı təcavüzkar siyasətini ifşa edən bir çox sənədləri nəşr etdiribdir. Bu sənədlərdə ermənilər tərəfindən azərbaycanlılara qarşı etnik təmizləmə siyasəti, Xocalı faciəsi və digər dəhşətli faktlar öz əksini tapıbdır. Bildiyiniz kimi, “Qarabağ həqiqətləri” toplusu bir çox xarici dillərə tərcümə olunaraq xaricdə yayılıb və bütün bu reallıqları dünyaya çatdırır.
Böyük sənətçi Rafiq Babayev bütün ömrü boyu millətlərarası qardaşlıq və dostluğa sadiqlik nümayiş etdirmişdir. Onun əsərləri, gözəl melodiyaları millətindən, dinindən asılı olmayaraq, bütün insanları birləşdirirdi və bu da onun əsl insan, böyük humanist olduğunu sübut edir. Hər bir böyük sənətkarın həyatı insan ömründən çox uzundur. Bu gün Rafiq Babayevin yaradıcılığı bizimlədir, onun gözəl əsərləri, unudulmaz melodiyaları bizim ürəyimizdədir, Azərbaycan xalqı tərəfindən çox sevilir və daim ifa olunur.
Mən əminəm ki, Rafiq Babayev öz yaxınlarının, əzizlərinin, dostlarının və onu şəxsən tanımayan insanların ürəyində böyük sənətkar, musiqiçi, bəstəkar və eyni zamanda, ən yüksək insani keyfiyyətlərə malik olan nurlu bir şəxsiyyət kimi yaşayacaqdır. Mən çox şadam ki, bu albomu yaratmaqla biz böyük sənətkarın yaradıcılıq irsinin qorunması və təbliğinə öz töhfəmizi verə bilmişik.
Bir daha bütün mərasim iştirakçılarını ürəkdən salamlayıram və sizə cansağlığı arzulayıram.
X X X
Rafiq Babayevin ailəsi adından çıxış edən qızı Fərziyyə Babayeva nəcib təşəbbüsünə görə Heydər Əliyev Fondunun prezidenti Mehriban xanım Əliyevaya dərin minnətdarlığını bildirdi.
Mehriban xanımın Azərbaycan mədəniyyətinin inkişafı sahəsindəki xidmətlərinin böyük önəm daşıdığını vurğulayan kinorejissor, xalq artisti Oqtay Mirqasımov yeni albomu Heydər Əliyev Fondunun mədəniyyətimizə növbəti töhfəsi kimi qiymətləndirdi. O, televiziya muğam müsabiqələrinin milli musiqimizin qorunmasındakı roluna da toxundu, bunun müqəddəs bir iş olduğunu söylədi.
Oqtay Mirqasımov Rafiq Babayev ilə bağlı xatirələrini də bölüşdü.
Bu təqdimatın Azərbaycanın bütün musiqisevərlərinin ürəyincə olduğunu bildirən Azərbaycan Milli Konservatoriyasının rektoru, xalq artisti Siyavuş Kərimi ümummilli lider Heydər Əliyevin Rafiq Babayevin sənətini həmişə yüksək qiymətləndirdiyini xatırlatdı. O dedi ki, ulu öndər 1994-cü ilin martında Bakı metrosunda törədilmiş terror aktı barədə danışanda Rafiq Babayevin itkisini xüsusi qeyd edirdi.
Təqdimat mərasimi incəsənət ustalarının çıxışı ilə başa çatdı.
######
 |
 |
 |
Bölmənin digər xəbərləri
