Admiral Riçard Nayton: Böyük Britaniya “Soyuq müharibə”dən bəri ən təhlükəli dövrdən keçir
London, 5 iyun, AZƏRTAC
Böyük Britaniyanın Silahlı Qüvvələrinin Baş Qərargah rəisi, admiral Riçard Nayton bildirib ki, ölkənin üzləşdiyi risk və təhdidlər Soyuq Müharibənin başa çatmasından bəri ən yüksək səviyyəyə çatıb.
AZƏRTAC xəbər verir ki, “BBC Radio 4”ün “Today” proqramına müsahibəsində çıxış edən Riçard Nayton hazırkı vəziyyəti karyerası ərzində gördüyü ən təhlükəli dövr kimi qiymətləndirib.
Onun sözlərinə görə, bu ilin ilk beş ayında Rusiya strateji hərbi təyyarələrinin Böyük Britaniyanın hava məkanına yaxınlaşması və ya onu pozması halları ötən ilin bütün dövründə qeydə alınan göstəriciyə bərabər olub.
Baş Qərargah rəisi qeyd edib ki, ötən il dərc olunan Strateji Müdafiə İcmalı ölkə üçün ciddi xəbərdarlıq xarakteri daşıyır. Son onilliklərdə Britaniya Silahlı Qüvvələri daha çox qısamüddətli və məhdud münaqişələrə hazırlaşsa da, hazırda Ukraynadakı müharibə kimi uzunmüddətli və genişmiqyaslı qarşıdurmalara hazır olmaq zərurəti yaranıb.
Riçard Naytonun açıqlamaları Böyük Britaniyada Müdafiə İnvestisiyaları Planının yaxın həftələrdə dərc olunmasının gözlənildiyi bir vaxta təsadüf edir. Sənəd qarşıdakı on il ərzində yeni hərbi texnika və müdafiə infrastrukturunun maliyyələşdirilməsi istiqamətlərini müəyyən edəcək.
Bölmənin digər xəbərləri
