Altıncı “Yüksəliş” müsabiqəsinin analitik təhlil imtahanının nəticələri açıqlanıb
Bakı, 5 iyun, AZƏRTAC
Altıncı “Yüksəliş” müsabiqəsinin analitik təhlil imtahanının nəticələri elan olunub.
Müsabiqənin işçi qrupundan AZƏRTAC-a bildirilib ki, mayın 23-24-də keçirilən imtahanda iştirak edən 6112 namizəddən 1468 nəfər müsabiqənin növbəti mərhələsində iştirak hüququ qazanıb.
Analitik təhlil imtahanında iştirakçılara verbal, rəqəmsal və abstrakt təhlil blokları üzrə suallar təqdim edilib. İmtahanın yerinə yetirilməsi üçün iştirakçılara ümumilikdə 3 saat vaxt ayrılıb.
İmtahan nəticələrinə əsasən, analitik təhlil mərhələsi üzrə keçid balı 561 T-şkalası olaraq müəyyən edilib.
Müsabiqədə ədalətli və obyektiv qiymətləndirmənin təmin edilməsi məqsədilə test suallarının nəticələri beynəlxalq təcrübədə geniş tətbiq olunan T-şkalası əsasında hesablanıb. T-şkalası TOEFL, GMAT, SAT və digər beynəlxalq imtahanlarda istifadə edilən qiymətləndirmə üsullarından biridir. Bu metod iştirakçıların nəticələrinin vahid və müqayisəli meyarlar əsasında dəyərləndirilməsinə imkan yaradır.
Analitik təhlil imtahanını uğurla tamamlayan iştirakçılar altıncı “Yüksəliş” müsabiqəsinin növbəti mərhələsi olan idarəetmə bacarıqları üzrə imtahanda iştirak etmək hüququ əldə ediblər. İdarəetmə bacarıqları imtahanına keçid edən iştirakçıların 1209 nəfərini kişi, 259 nəfərini isə qadın təşkil edir.
Yaş qrupları üzrə təhlil göstərir ki, uğur qazanan namizədlər arasında ən yüksək göstərici 21-30 yaş aralığında qeydə alınıb. Növbəti mərhələdə iştirak hüququ qazananlardan 803 nəfəri 21-30 yaş, 624 nəfəri 31-40 yaş, 41 nəfəri isə 41-51 yaş aralığındadır.
İqtisadi rayonlar üzrə nəticələrə əsasən, ən yüksək göstərici Bakı şəhəri üzrə qeydə alınıb. Paytaxt üzrə 763 nəfər namizəd növbəti mərhələdə iştirak hüququ əldə edib. Yüksək göstəricilərin qeydə alındığı digər iqtisadi rayonlar sırasında Abşeron-Xızı iqtisadi rayonu üzrə 96 nəfər, Qarabağ iqtisadi rayonu üzrə 84 nəfər, Lənkəran-Astara iqtisadi rayonu üzrə 68 nəfər, Qazax-Tovuz iqtisadi rayonu üzrə 67 nəfər iştirakçı yer alır.
Təhsil göstəriciləri baxımından bakalavriat pilləsi üzrə ən çox uğur qazanan iştirakçılar Azərbaycan Dövlət İqtisad Universiteti, Bakı Dövlət Universiteti, Azərbaycan Respublikası Prezidenti yanında Dövlət İdarəçilik Akademiyası, Azərbaycan Dövlət Neft və Sənaye Universiteti və ADA Universitetinin məzunları arasından olub.
İştirakçıların fəaliyyət göstərdikləri sektorlar üzrə bölgüsünə əsasən, növbəti mərhələyə keçən namizədlərin 48.37 faizi dövlət sektorunu, 48.90 faizi özəl sektoru, 1.13 faizi qeyri-hökumət təşkilatlarını, 1.60 faizi isə beynəlxalq qurumları təmsil edir.
Qeyd edək ki, “Yüksəliş” müsabiqəsi çərçivəsində yalnız nəzəri biliklər deyil, eyni zamanda, analitik düşüncə, qərarvermə, məsuliyyət götürmə, komanda idarəetməsi və liderlik bacarıqları da qiymətləndirilir. Müsabiqə qalibləri mentorluq proqramı, fərdi inkişaf planları və real layihələrdə iştirak imkanları əldə edərək peşəkar inkişaflarını davam etdirirlər. Müsabiqədə iştirak etmək üçün namizədlər Azərbaycan Respublikasının vətəndaşı olmalı, qeydiyyatın son gününə qədər 21-51 yaş aralığında olmalı, ali təhsilə və minimum 2 illik idarəetmə təcrübəsinə malik olmalıdırlar.
Xatırladaq ki, “Yüksəliş” müsabiqəsi Azərbaycan Prezidenti İlham Əliyevin 2019-cu il 26 iyul tarixli Sərəncamına əsasən, intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub. Altıncı “Yüksəliş” müsabiqəsinin keçirilməsi ilə bağlı Prezident İlham Əliyev tərəfindən 2025-ci il dekabrın 10-da müvafiq Sərəncam imzalanıb.
Bölmənin digər xəbərləri
