Hindistan ordusu dağlarda itən An-32 təyyarəsinin axtarışlarını davam etdirir
Bakı, 4 iyun, AZƏRTAC
Hindistan ordusu dispetçerlərlə əlaqəni itirən An-32 hərbi-nəqliyyat təyyarəsinin axtarışı üzrə əməliyyatı davam etdirir.
AZƏRTAC xarici KİV-lərə istinadla xəbər verir ki, bu barədə Hindistan Hərbi Hava Qüvvələrinin mətbuat xidməti məlumat yayıb.
An-32 hərbi-nəqliyyat təyyarəsi iyunun 3-də yerli vaxtla saat 12:25-də Assam ştatının Corhat şəhər aeroportundan ölkənin şimal-şərqində yerləşən Arunaçal-Pradeş ştatına tərəf istiqamət götürüb. Təyyarə havaya qalxdıqdan 35 dəqiqə sonra dispetçerlə sonuncu dəfə əlaqə saxlayıb.
Hindistan ordusu digər hökumət və vətəndaş strukturları ilə birgə itən təyyarənin axtarışları üzrə ləngimədən əməliyyata başlayıb. Axtarışlar gecə saatlarında da davam edib. Əlverişsiz hava şəraiti axtarış əməliyyatını xeyli çətinləşdirir. Hərbçilər təyyarənin qəzaya uğradığını ehtimal edirlər. Artıq onun düşdüyü yer barədə informasiya alındığı bildirilir.
Təsdiqlənmiş məlumata görə, təyyarənin göyərtəsində altı hərbçi, beş ekipaj üzvü və iki mülki şəxs olub.
Bölmənin digər xəbərləri
