HÖVSAN AERASİYA STANSİYASI YENİDƏN QURULUR
AZƏRTAC xəbər verir ki, “Azərsu” Səhmdar Cəmiyyəti Hövsan aerasiya stansiyasını yenidən qurur.
Fransa hökumətinin ayırdığı kredit hesabına həyata keçirilən layihə çərçivəsində 2 nömrəli Zığ nasos stansiyası və əsas ötürücü kanalizasiya xətləri də yenidən qurulur. Məqsəd tullantı sularının dənizə axıdılmasının qarşısını almaqdır. Yenidənqurma prosesində 2 nömrəli Zığ kanalizasiya nasos stansiyasından Hövsan təmizləyici qurğusuna gedən 5 min 100 metrlik 3 ötürücü xətt dəyişdiriləcək, bununla da stansiyanın gücü sutkada 200 min kubmetrə çatdırılacaqdır. Bundan əlavə, Hövsan aerasiya stansiyasında gündəlik gücü 160 min kubmetr olan yeni texnoloji xətt çəkiləcək, bütün stansiya üçün hava-diffuziya sistemi yeniləşdiriləcəkdir.
Stansiyada yeni qumtutan qurğunun tikintisinə də başlanmışdır. Layihədə yeni lildurulducu binanın və iki aktiv lil xəttinin tikilməsi nəzərdə tutulmuşdur. Yeri gəlmişkən, layihənin ümumi dəyəri 43,95 milyon avrodur.
Yenidənqurma işləri yekunlaşandan sonra stansiyanın gücü sutkada 640 min kubmetrə çatacaqdır.
Tikinti işlərinin 2008-ci ilin sonunadək başa çatdırılması nəzərdə tutulmuşdur.
Bölmənin digər xəbərləri
