ELM VƏ TƏHSİL
“İkinci Qarabağ müharibəsində tarixi zəfər” - konfrans
Bakı, 6 noyabr, AZƏRTAC
AMEA-nın A.A.Bakıxanov adına Tarix və Etnologiya İnstitutunda “İkinci Qarabağ müharibəsində tarixi zəfər” adlı konfrans keçirilib.
İnstitutdan AZƏRTAC-a bildirilib ki, konfransda institutun əməkdaşları ilə yanaşı, Birinci Qarabağ müharibəsində itkin düşmüş şəhid Bafadar Mirzəyevin anası Səkinə Mirzəyeva, Birinci Qarabağ müharibəsi veteranları Yaşar Bəhramov, Bəxtiyar Əhmədov və Soltan Orucov, Vətən müharibəsi qaziləri polkovnik Məhərrəm Həmidov, gizirlər Xəzər Maqsudlu, Emin Həbibov, çavuş Qüdrət Zeynallı, əsgər Murad Məmmədov iştirak edib.
Tədbir Dövlət Himninin səsləndirilməsi, şəhidlərin əziz xatirəsinin bir dəqiqəlik sükutla yad edilməsi ilə başlayıb.
Açılış nitqi ilə çıxış edən institutun icraçı direktoru tarix elmləri doktoru İlqar Niftəliyev Vətən müharibəsində qazanılan Qələbənin xalqımızın vətənpərvərliyini, qəhrəmanlığını dünyaya göstərdiyini söyləyib. Bildirib ki, İkinci Qarabağ müharibəsi Azərbaycanın şanlı tarixidir.
Vətən müharibəsi qaziləri çıxışlarında keçdikləri döyüş yolu, yaşadıqları hadisələri bölüşüblər. İştirakçılar Vətən müharibəsi dövründə xalqımızın ordumuza dəstəyinin, inamının onların mübarizə gücünü daha da artırdığını, qələbəyə ruhlandırdığını bildiriblər.
Daha sonra professor Mais Əmrahov “44 günlük zəfər tariximiz” adlı məruzə ilə çıxış edib. Məruzədə Vətən müharibəsində qardaş Türkiyənin siyasi-mənəvi dəstəyi diqqətə çatdırılıb. Vurğulanıb ki, 44 günlük Vətən müharibəsində qazanılan qələbə Azərbaycan xalqının birliyinin nümayişi oldu.
Mais Əmrahov Azərbaycan Prezidentinin 2020-ci ilin dekabrında imzaladığı müvafiq sərəncamlara əsasən sentyabrın 27-nin Anım Günü, noyabrın 8-nin Zəfər Günü kimi təsis edildiyini qeyd edib və bu əlamətdar günlərin tarixi əhəmiyyətinə diqqət çəkib.
Sonra institutun əməkdaşları - tarix üzrə fəlsəfə doktoru dosent Alı Balayev “Qarabağın dağlıq hissəsində 23 saatlıq antiterror tədbirləri: nəticələr və qarşıda duran vəzifələr”, böyük elmi işçi Soltan Orucov “İşğaldan azad olunmuş ərazilərdə bərpa və quruculuq işləri” mövzusunda məruzələrlə çıxış ediblər.