İLİN BİRİNCİ YARISI “ AZƏRİKİMYA” DÖVLƏT ŞİRKƏTİ ÜÇÜN UĞURLU OLMUŞDUR
Cari ilin birinci yarısında şirkətin müəssisələrində 28889 ton polietilen, 30281 ton etilen, 17325 ton propilen, 1315819 hKal buxar, 97934 mkVts elektrik enerjisi, 4311 ton propilen oksidi, 2859 ton poliefir qatranı, 11510 ton izopropil spirti, 3911 ton butadien, 6405 ton BİF, 11685 ton kaustik soda, 5362 ton maye xlor, 993 ton dixloretan və digər məhsullar istehsal edilmişdir.
Şirkətin əsas müəssisələrindən olan “Etilen-Polietilen” zavodu qəbul olunmuş 155720 milyon manat istehsal proqnozu əvəzinə 160497,2 milyon manatlıq məhsul istehsal edərək, proqnozu 103,1 faiz yerinə yetirmiş, proqnozdan artıq 4777,2 milyon manatlıq məhsul hazırlamışdır.
“Üzvi sintez” zavodu qəbul olunmuş 20500 milyon manat istehsal proqnozu əvəzinə 25356,7 milyon manatlıq məhsul istehsal edərək, proqnozu 123,7 faiz yerinə yetirmiş, 2003-cü ilin müvafiq dövrünə nisbətən artım sürəti 41,3 faiz təşkil etmişdir.
“Sintezkauçuk” zavodu qəbul edilmiş 33250 milyon manatlıq istehsal proqnozu əvəzinə 36365 milyon manatlıq məhsul istehsal edərək, proqnozu 109,4 faiz yerinə yetirmiş, 2003-cü ilin müvafiq dövrü ilə müqayisədə artım sürəti 52,9 faiz olmuşdur.
Səthi aktiv maddələr zavodunda qəbul edilmiş 22100 milyon manatlıq istehsal proqnozu əvəzinə 20402,6 milyon manatlıq məhsul istehsal edilərək, proqnoz 92,3 faiz yerinə yetirilmiş, 2003-cü ilin müvafiq dövrünə nisbətən artım sürəti 20,1 faiz olmuşdur.
2004-cü ilin birinci yarısında “Azərikimya” Dövlət Şirkətinin müəssisələrində işçilərin orta siyahı sayı 7400 nəfər olmuş, orta aylıq əmək haqqı 453 min manat təşkil etmişdir ki, bu da 2003-cü ilin müvafiq dövründən 91 min manat çoxdur. Şirkətin müəssisələrində çalışan işçilərə 20411,8 milyon manat əmək haqqı verilmişdir.
Dövlət büdcəsinə proqnozda nəzərdə tutulan 5460,0 milyon manat əvəzinə 5511,3 milyon manat, DSMF-ya 5952,0 milyon manat əvəzinə 5409,6 milyon manat vəsait ödənilmişdir.
Görülmüş texniki tədbirlər nəticəsində şirkətin müəssisələrini ucuz texniki su ilə təmin etmək məqsədi ilə, yeni su xətti çəkilərək istifadəyə verilmiş və bununla əlaqədar kimya məhsullarının maya dəyərində texniki suyun məbləği 3 dəfəyə qədər azalmışdır.
Bununla bərabər “Azərikimya” Dövlət Şirkəti cari ilin birinci yarısında “Buxar-generator” kompleksinin tikintisinə dövlət zəmanəti ilə alınmış kreditə görə 8187,5 min ABŞ dolları məbləğində vəsait ödəmişdir. Ümumiyyətlə, kredit açılan vaxtdan 2004-cü il iyulun 1-dək 49436,6 min ABŞ dolları (əsas borc, kreditin istifadə faizi, əsas borca hesablanmış faiz, bank xidmətləri və s.) qaytarılmışdır.
2004-cü ilin 6 ayında 19,0 milyon manat enerjidaşıyıcılara, 2068,0 milyon manat xammal və materiallara qənaət edilmişdir. Əsas xammal olan naftaya 1072 ton qənaət olunmuşdur.
Azərbaycan Respublikası Prezidentinin 24 noyabr 2003-cü il və 11 fevral 2004-cü il tarixli Fərmanlarının yerinə yetirilməsi üçün şirkət üzrə kompleks tədbirlər işlənib hazırlanmışdır və həyata keçirilir. 2004-cü ildə istehsalın həcminin artırılması, mövcud iş yerlərinin bərpası və yeni iş yerlərinin açılmasının təmin edilməsi, işçilərin əmək haqlarının artırılması, müəssisələrin sabit fəaliyyətinin təmin edilməsi, respublikanın ayrı-ayrı regionlarında yerləşən emal müəssisələri ilə əlaqələrin gücləndirilməsi, yerli xammallara əsaslanan kimya məhsullarının istehsalının təşkil edilməsi və s. bu tədbirlərin ən vacibləridir.
Şirkətin müəssisələrində istehsal olunan məhsulların çox hissəsi ixrac edilir (polietilen, izopropil spirti, piroliz qətranları, propilen, poliefir qətranları, propilen oksidi, dixloretan və s.) və dünyanın bir çox ölkələrinin firma və şirkətləri ilə işgüzar əlaqələr yaradılmışdır.
Bölmənin digər xəbərləri
