“İlin Gənci” mükafatının qalibi: Bu nailiyyət təkcə mənim deyil, gənclərə göstərilən etimadın rəmzidir
Bakı, 5 fevral, Xatirə Cəfərova, AZƏRTAC
Azərbaycan Dövlət İqtisad Universitetinin (UNEC) İqtisadiyyat və idarəetmə fakültəsinin IV kurs tələbəsi Ərhun Baxış 2026-cı il üzrə Gənclər və İdman Nazirliyi tərəfindən təsis edilmiş “İlin Gənci” mükafatının qalibi olub. Ərhun universitetin ictimai həyatında fəal iştirak edir. O, 2023–2024-cü illərdə “Bir Könüllü” Tələbələrin Əməkdaşlığı İctimai Birliyinin insan resursları üzrə meneceri olub, 2024-cü ildən isə “Vətəndaş Cəmiyyətində Debat” İctimai Birliyində sədr müavinidir. O, həmçinin Yeni Azərbaycan Partiyasının Gənclər Birliyinin təşəbbüsü ilə yaradılmış UNEC “YENİ Klub” təşkilatının sədri vəzifəsini icra edir.
AZƏRTAC-a müsahibəsində Ərhun mükafatla bağlı təəssüratlarını bölüşərək bildirib: “Bu mükafat mənim üçün şəxsi nailiyyətdən daha çox, gəncliyə göstərilən etimadın və diqqətin rəmzidir. Prezident İlham Əliyevin həyata keçirdiyi dövlət gənclər siyasəti gənclərin potensialını üzə çıxarmağa və cəmiyyətin müxtəlif sahələrində fəal iştirak etməyə geniş imkanlar yaradır. Belə bir mühitdə gənclərin əməyinin qiymətləndirilməsi bizi daha məsuliyyətli və məqsədyönlü olmağa sövq edir”.
Ərhun əlavə edib: “Bu mükafatı böyük xidmət yolunda mənəvi məsuliyyət kimi qəbul edirəm. Bu, görülən işlərə verilən dəyər olmaqla yanaşı, gələcəkdə daha sistemli, daha təsirli və daha çox gənci əhatə edən fəaliyyətlər üçün çağırışdır. Mənim üçün bu uğur şəxsi tanınmadan daha çox, Ulu Öndərin müəyyən etdiyi yol və bu gün uğurla davam etdirilən gənclər siyasəti çərçivəsində gənclərin öz gücünə inanmasına töhfə vermək imkanıdır”.
UNEC-də formalaşmış intellektual mühit haqqında danışan Ərhun deyib: “UNEC mənim şəxsi və peşəkar inkişafımın əsas təməli olub. Bu universitet mənə təkcə akademik biliklər deyil, strateji düşüncə, məsuliyyətli mövqe və gələcəyə yönəlik baxış qazandırıb. UNEC-də formalaşan intellektual mühit mənim dünyagörüşümün genişlənməsində, özümə və cəmiyyətə qarşı daha tələbkar yanaşma formalaşdırmağımda həlledici rol oynayıb”.
Hazırda sədri və sədr müavini olduğu təşkilatlarda gənclər üçün prioritet layihələrdən danışan Ərhun bildirib: “Fəaliyyətimizi strateji baxımdan insan kapitalının inkişafına yönəldirik. “Vətəndaş Cəmiyyətində Debat” İctimai Birliyində və “YENİ Klub”da əsas məqsədimiz sağlam düşüncəli, milli dəyərlərə bağlı, ictimai məsələlərdə fəal və məsuliyyət daşıyan Azərbaycan gəncinin yetişməsinə töhfə verməkdir. Layihələrimiz gənclərin bilik səviyyəsini, vətəndaş mövqeyini və liderlik potensialını gücləndirməyə hesablanıb”.
O vurğulayıb ki, region gəncləri ilə iş aparılması da prioritetdir: “Region gənclərinin imkanlara çıxışını genişləndirmək, intellektual və ictimai fəallığını artırmaq, mərkəz–region fərqini minimuma endirmək əsas hədəfimizdir. Regionlarda keçirilən təlimlər, inkişaf proqramları və şəbəkələşmə təşəbbüsləri gənclərin öz potensialına inanmasına və cəmiyyətə daha fəal şəkildə inteqrasiya olunmasına xidmət edir”.
“Mənim üçün bu fəaliyyətlərin ümumi fəlsəfəsi dəyişməzdir: bu günün aktiv gəncini deyil, sabahın məsuliyyətli vətəndaşını formalaşdırmaq . Həyata keçirdiyimiz layihələrin əsas ölçüsü də məhz budur — sağlam, düşünən və gələcəyin məsuliyyətini daşımağa hazır Azərbaycan gəncinin yetişməsinə verdiyimiz real töhfə”, - deyə Ərhun Baxış bildirib.
Bölmənin digər xəbərləri
