Bakı, 11 noyabr (AZƏRTAC). Bakı Pedaqoji Kadrların İxtisasartırma və Yenidənhazırlanma İnstitutunda Dövlət Bayrağı və Konstitusiya günlərinə həşr edilmiş təntənəli yığıncaq keçirilmişdir.

İnstitutun mətbuat xidmətindən AZƏRTAC-a bildirmişlər ki, professor-müəllim heyətinin, Gənclər Təşkilatının üzvlərinin qatıldığı yığıncaqda institutun rektoru, professor Asəf Zamanov iştirakçıları bayram münasibətilə təbrik etmiş, qürur mənbəyimiz olan bayrağımızın şanlı tarixi haqqında danışmışdır. Qeyd edilmişdir ki, 1918-ci il mayın 28-də Azərbaycanın Dövlət Müstəqilliyi elan olunduqdan bir müddət sonra iyunun 24-də Azərbaycan Xalq Cümhuriyyəti hökuməti dövlət atributları, o cümlədən Dövlət Bayrağı haqqında qərarlar qəbul etmişdir. Bununla əlaqədar xeyli müzakirələr getmiş, nəhayət, 2018-ci il noyabrın 9-da parlament Dövlət Bayrağını təsdiqləmişdir. Çox keçmədən Azərbaycanın müstəqilliyi ilə bərabər, üçrəngli bayrağı da əlindən alınmışdır.

Rektor, həmçinin 1990-cı ildə baş verən hadisələri xatırlatmış, 70 ildən sonra üçrəngli bayrağımızın ulu öndər Heydər Əliyevin təşəbbüsü ilə Naxçıvan Muxtar Respublikasının bayrağı kimi qəbul olunmasından, Azərbaycan Ali Soveti qarşısında bununla bağlı vəsatət qaldırılmasından danışmışdır. Diqqətə çatdırılmışdır ki, son illər Prezident İlham Əliyev bu mühüm dövlət atributu ilə bağlı mühüm qərarlar qəbul etmişdir. Belə ki, dövlətimizin başçısının Sərəncamı ilə Dövlət Bayrağı Günü təsis olunmuş, Dövlət Bayrağı Meydanı yaradılmışdır. Üçrəngli bayrağımız bu gün dünyanın 70-ə yaxın ölkəsində Azərbaycanın müxtəlif statuslu diplomatik nümayəndəlikləri üzərində dalğalanır. Beynəlxalq tədbirlərdə, idman arenalarında qaldırılır və bu, hər bir soydaşımızın qəlbini iftixar hissi ilə doldurur. Xalqımızın ən böyük arzusu bayrağımızın Xankəndində, Şuşada və işğal olmuş digər rayonlarımızda dalğalanmasını görməkdir.

A.Zamanov müstəqil Azərbaycanın Konstitusiyası haqqında da məlumat verərək bildirmişdir ki, ulu öndər Heydər Əliyevin müstəsna xidmətlərindən biri ölkənin Əsas Qanununun işlənib hazırlanması və qəbul olunmasıdır. Ümummilli Lider Konstitusiya layihəsinin hazırlanmasına şəxsən rəhbərlik etmiş, geniş müzakirələrdən sonra 1995-ci il noyabrın 12-də ümumxalq referendumu ilə Azərbaycan Respublikasının yeni Konstitusiyası qəbul olunmuşdur.

Demokratik dəyərlərə və dünya təcrübəsinə əsaslanan Konstitusiyada vətəndaşların əsas hüquq və azadlıqlarının, o cümlədən təhsil hüququnun təsbit olunduğunu diqqətə çatdıran A.Zamanov demişdir: Təhsil sahəsinin işçiləri olaraq, biz Konstitusiyanın qarşımızda açdığı geniş imkanların şahidiyik. Prezident İlham Əliyevin “Azərbaycan təhsilinin inkişafı üzrə Dövlət Strategiyasının təsdiq olunması haqqında” Sərəncamı bu həqiqəti bir daha təsdiqləyir. Biz də hamılıqla çalışmalıyıq ki, Əsas Qanunun və dövlətimizin başçısının təhsilin inkişafı üçün yaratdığı münbit şəraitdən faydalanaq, Vətənimizə dəyərli töhfələr verək.

Digər çıxışlarda da Dövlət Bayrağının və Konstitusiyanın hər bir Azərbaycan vətəndaşının qürur mənbəyi olduğu, gənc nəslin vətənpərvərlik ruhunda formalaşmasında böyük rol oynadığı vurğulanmışdır.