İRAN BAEA İLƏ ƏMƏKDAŞLIĞI DAYANDIRMAQLA HƏDƏLƏYİR

13.01.2006 [19:04]
Çap et
A⁺ A^-

AZƏRTAC İRNA agentliyinə istinadla xəbər verir ki, İranın nüvə dosyesi BMT-nin Təhlükəsizlik Şurasına verilərsə, Tehran Beynəlxalq Atom Enerjisi Agentliyi (BAEA) ilə “könüllü” əməkdaşlığı dayandıracaqdır. Bunu İranın xarici işlər naziri Mənuçehr Mottəki hökumətin yanvarın 12-də keçirilən iclasının yekunlarına əsasən bildirmişdir.

Bununla belə, Mottəki Rusiya və Avropa “üçlüyü” (Böyük Britaniya, Fransa, Almaniya) ilə İran atom proqramına dair danışıqları davam etdirməyə hazır olduğunu bildirmişdir. O demişdir: “Biz London, Paris və Berlini təmkinli və ağıllı yanaşmaya çağırırıq. Rusiya nümayəndə heyətinin Tehrana səfəri zamanı bu ölkənin təklifini, - söhbət RF ərazisində uranı birgə saflaşdırma müəssisəsinin yaradılmasından gedir, - ətrafli müzakirə etmiş və danışıqları Moskvada davam etdirmək qərarına gəlmişik. Avropalılar anlamalıdırlar ki, İranın nüvə dosyesinin BMT TŞ-yə verilməsi İslam Respublikası Məclisinin BAEA ilə könüllü əməkdaşlığı dayandırması ilə nəticələnəcəkdir”.

Mottəki Böyük Britaniya, Fransa və Almaniyanı özlərini İranla bütün əlaqələrin mümkünsüz olacağı vəziyyətə salmamağa çağırmışdır.