İRAN XƏZƏR PROBLEMİNİN TƏNZİMLƏNMƏSİNİN İKİTƏRƏFLİ SXEMİ İLƏ RAZILAŞMIŞDIR
Xəzər probleminin tənzimlənməsi məsələsində İranın mövqeyi kifayət qədər fəaldır. Bu fikri İTAR-TASS-ın müxbiri ilə söhbətində Rusiya xarici işlər nazirinin müavini Viktor Kalyujnı Tehranda apardığı məsləhətləşmələrin yekunlarına əsasən söyləmişdir. Diplomat demişdir: “İran tərəfinin kifayət qədər dəqiq mövqeyi var və bu, hörmətə layiqdir”.
Onun sözlərincə, “indi demək olar ki, İran ikitərəfli sxemlə razılaşmışdır və Xəzərlə bağlı bütün problemləri ikitərəfli danışıqlar yolu ilə tənzimləməyə çalışır”. O vurğulamışdır ki, “İran tərəfi Xəzərin Türkmənistan şelfinin işlənilməsində birgə iştirakı haqqında bu ölkə ilə danışıqlar aparmağa hazır olduğunu bildirmişdir”.
V.Kalyujnı demişdir ki, bu məsələ Tehranda məsləhətləşmələr zamanı müzakirə edilmişdir. Onun fikrincə, “bu təklif obyektidir, vaxtında irəli sürülmüşdür və İran üçün faydalıdır, çünki Xəzərin cənub bölgəsində işləməyə başlamağa imkan verir”. Rusiya diplomatı demişdir ki, “bu, İrana Xəzər dənizinin statusunun nizama salınması ilə bağlı problemləri həll etməyə mane olmur”.
V.Kalyujnı bildirmişdir ki, “Rusiya ilə İran Xəzərə aid bütün məsələləri bir daha müzakirə etmək üçün yanvarın 15-i ilə 20-si arasında Tehranda daha bir görüş keçirmək barədə razılığa gəlmişlər”.
Bundan əlavə, İran tərəfi 2003-cü ildə Tehranda Xəzərə dair zirvə görüşü keçirmək təklifini irəli sürmüşdür. V.Kalyujnının dediyinə görə, Rusiya bu təklifi dəstəkləmişdir.
Bölmənin digər xəbərləri
