İranda polis zorakılığının qurbanı olmuş Məhsa Əmininin məzarına qarşı vandallıq edilib
Bakı, 24 may, AZƏRTAC
Ötən ilin sentyabrında polis zorakılığına məruz qalan və həyatını itirən iranlı qadın Məhsa Əmininin məzarına qarşı vandallıq edilib.
AZƏRTAC BBC telekanalına istinadla xəbər verir ki, Məhsa Əmininin Saqqız şəhərindəki Açı qəbiristanlığında yerləşən məzarının başdaşı üzərindəki şüşə lövhə naməlum şəxslər tərəfindən sındırılıb. Bununla bağlı məlumatı və fotoşəkli instaqram sosial şəbəkəsində onun qardaşı yayıb və bildirib ki, bu, bacısının məzarına qarşı törədilən ikinci vandallıqdır. Əşkan Əmini vandallara müraciət edərək yazıb ki, onlar bacısının qəbirüstü fotoşəklini dəfələrlə silsələr də, onun ailəsi başdaşını bərpa edəcək.
Ötən il sentyabrın 16-da Tehranın əxlaq polisi tərəfindən başını örtmədiyinə görə həbs edilən 22 yaşlı Məhsa Əmininin zorakılığa məruz qalması və həyatını itirməsi İranda molla rejiminə qarşı kütləvi iğtişaşlara səbəb olmuşdu. İran məhkəməsi etirazçıların bir neçəsini edam etmiş, çoxlu sayda gənc həbs olunmuşdu. Ötən həftənin cümə günü molla rejimi daha 3 etirazçını edam edib.
Bölmənin digər xəbərləri
