İRANIN MƏDƏNİYYƏT VƏ İSLAMİ İRŞAD NAZİRİ BAKIYA RƏSMİ SƏFƏRƏ GƏLMİŞDİR
İran İslam Respublikasının mədəniyyət və islami irşad naziri Əhməd Məscid Cameinin rəhbərlik etdiyi nümayəndə heyəti dekabrın 7-də Bakıya rəsmi səfərə gəlmişdir.
Azərbaycan Mədəniyyət Nazirliyinin mətbuat xidmətindən AZƏRTAC-a bildirilmişdir ki, 13 nəfərdən ibarət nümayəndə heyətini Bakı hava limanında respublikamızın mədəniyyət naziri Polad Bülbüloğlu qarşılamışdır. Sonra qonaqlar Şəhidlər xiyabanına gələrək, Azərbaycanın müstəqilliyi və ərazi bütövlüyü uğrunda canlarını qurban vermiş qəhrəmanların məzarlarını ziyarət etmiş, “Əbədi məşəl” abidəsinin önünə əklil qoymuşlar.
Onlar Fəxri xiyabanda uyuyan mədəniyyət və incəsənət xadimlərimizin məzarlarını da ziyarət etmişlər.
Dekabrın 11-dək davam edəcək səfərdə qonaqlar Azərbaycan Dövlət Akademik Milli Dram Teatrında Şeksprin “Hamlet” dramının tamaşasına baxacaq, M.F.Axundov adına Azərbaycan Dövlət kitabxanası, musiqi mədəniyyəti, xalça muzeyləri, İçərişəhərlə, o cümlədən Şirvanşahlar sarayı kompleksi ilə tanış olacaq, S.Bəhlulzadə adına Sərgi salonunda İran rəssam və nəqqaşlarının əsərlərindən ibarət sərgiyə baxacaqlar.
Səfər müddətində nümayəndə heyətinin Qafqaz Müsəlmanları İdarəsində, Dini Qurumlarla İş üzrə Dövlət Komitəsində, xarici işlər, gənclər, idman və turizm nazirliklərində görüşləri də nəzərdə tutulmuşdur.
Bölmənin digər xəbərləri
