İslam Əməkdaşlıq Təşkilatı Modeli – 2020 konfransı işini yekunlaşdırıb
Bakı, 8 iyun, AZƏRTAC
Bakıda yerləşən İslam Əməkdaşlıq Təşkilatı (İƏT) Gənclər Forumunun Avrasiya üzrə Regional Mərkəzinin təşkilatçılığı və Azərbaycan Respublikası Gənclər və İdman Nazirliyinin tərəfdaşlığı ilə həyata keçirilən beynəlxalq İƏT Modeli layihəsi çərçivəsində “İƏT Modeli - 2020” konfransı onlayn formatda işini yekunlaşdırıb.
Regional Mərkəzdən AZƏRTAC-a bildiriblər ki, iki aydan çox davam etmiş və ümumilikdə 50 min gənci əhatə etmiş layihənin milli formatının yekununda Azərbaycanın aparıcı universitetlərindən 60-a yaxın seçilmiş tələbə İƏT-in üzv ölkələrini təmsil edərək, bu qurumun xarici işlər nazirlərinin simulyasiya konfransına qatılıblar.
Tədbirin açılış hissəsində çıxış edən Regional Mərkəzin İdarə Heyətinin sədri Elçin Əsgərov 2011-ci ildən etibarən bu proqram çərçivəsində istər milli, istərsə də beynəlxalq səviyyədə keçirilən tədbirlər haqqında məlumat verib. Mərkəzin baş direktoru Elməddin Mehdiyev İƏT haqqında məlumat verərək bu təşkilatın dünyada tutduğu mövqe və 1991-ci ildən bəri Azərbaycan - İƏT münasibətləri, o cümlədən Azərbaycanın ev sahibliyi ilə keçirilən İƏT tədbirləri barədə danışıb.
Gənclər və İdman nazirinin müavini İntiqam Babayev nazirliyin pandemiya dövründə həyata keçirdiyi və dəstək verdiyi onlayn layihələrdən bəhs edərək, İƏT Modeli layihəsinin artıq 10 ildir ki, nazirliyin tərəfdaşlığı ilə təşkil olunduğunu və bu il təşkilatçıların birgə qərarı ilə pandemiya ilə əlaqədar onlayn formatda keçirildiyini bildirib. Nazir müavini İƏT Gənclər Forumunun Avrasiya üzrə Regional Mərkəzi ilə nazirlik arasında uğurlu əməkdaşlığın mövcudluğunu və Azərbaycan gəncliyinin Regional Mərkəzin fəaliyyətlərindən daha artıq faydalana bilməsi üçün bu əməkdaşlığın inkişaf etdiriləcəyini bildirərək gənclərə uğurlar arzulayıb. Nazirliyin əməkdaşı Rüstəm Abdullayev bu qurumun onlayn həyata keçirilən layihələri haqqında geniş təqdimat edib.
Sonra “Əfqanıstanın gələcəyi: əsas təhdidlər və sülh perspektivləri” mövzusunda İƏT Modeli Xarici İşlər Nazirləri konfransının simulyasiya oyunları keçirilib. Konfransda Əfqanıstanda hazırda mövcud vəziyyətlə bağlı müxtəlif İƏT ölkələrini təmsil edən nümayəndələr arasında geniş müzakirələr aparılıb və sonda müvafiq qətnamələr qəbul olunub.
Tədbirdə xüsusi bacarığı və fəallığı ilə seçilən gənclər bu il Kazan şəhərində keçirilməsi planlaşdırılan Beynəlxalq İƏT Modeli Sammitində iştirak etmək hüququ əldə ediblər.
Xatırladaq ki, “İƏT Modeli - Beynəlxalq Münasibətlər Akademiyası” təhsil proqramı artıq 10 ildir uğurla həyata keçirilir. Bu il pandemiya səbəbindən proqramın bütün mühazirələri onlayn rejimdə, milli dinləyicilər üçün Azərbaycan, beynəlxalq iştirakçılar üçün isə ingilis dilində həyata keçirilib. Bu proqram İƏT məkanında fəaliyyət göstərən gənclərin liderlik və kommunikasiya qabiliyyətlərinin yüksəldilməsinə yönəlib.
Bölmənin digər xəbərləri
