İSMAYILLININ TORPAQ MÜLKİYYƏTÇİLƏRİ PAYIZLIQ TAXIL SƏPİNİNİ SÜRƏTLƏ DAVAM ETDİRİRLƏR
İsmayıllıda payızlıq taxıl səpininə mütəşəkkil hazırlıqla başlanıldığından bu mühüm kampaniya uğurla davam etdirilir.
Bu barədə rayon icra hakimiyyətinin aqrar şöbəsindən AZƏRTAC-a verilən məlumatda bildirilir ki, qısa vaxtda 9 min hektardan çox sahədə səpin aparılmışdır. Son günlər havaların yağmurlu keçməsi səpində qısa fasilələr yaratsa da, torpaq mülkiyyətçiləri kampaniyanı optimal müddətdə başa çatdırmaq əzmindədirlər.
Rayonda payızlıq taxıl əkinlərinə 120-dək müxtəlif kənd təsərrüfatı maşınları səfərbər olunmuşdur. Onların 63-ü son illərdə alınmış yeni texnikadır ki, bunlar da məhsuldarlığı və keyfiyyəti ilə fermerləri razı salır. Nikitin adına təsərrüfatda, Tircan, Qələyə, Hacıhətəmli, Qubaxəlilli və bir sıra digər ərazi vahidlərində səpin daha mütəşəkkil keçirilir.
Taxılçılığın inkişafına göstərilən dövlət qayğısı bu sahə ilə məşğul olan fermerlərdə, eləcə də fiziki şəxslərdə mühüm strateji məhsulun istehsalına marağı xeyli artırmışdır. Bunun nəticəsidir ki, cari mövsümdə gələn ilin məhsulu üçün 28 min hektarda taxıl səpiləcəyi gözlənilir. Bu isə ötənilkindən 2,5 min hektar çoxdur.
Bölmənin digər xəbərləri
