İSRAİL JURNALİSTİ BAKININ QONAĞIDIR
İsrailin tanınmış jurnalisti, tarixçi və yazıçı Vladimir Fromer Bakıdadır. Bu günlərdə “Soxnut” Yəhudi Agentliyinin ofisində ölkəmizin kütləvi informasiya vasitələrinin nümayəndələri ilə onun görüşü olmuşdur.
Vladimir Fromer hazırda İsraildə yaşayan həmyerlilərimizdən, bu ölkədəki ictimai-siyasi vəziyyətdən, habelə gələcək yaradıcılıq planlarından danışmışdır.
Fromerin tarixi esseləri, hekayələri və məqalələri həm İsraildə, həm də digər xarici ölkələrin rusdilli dövri mətbuatında tez-tez dərc olunur. Onun 1997-ci ildə həm Rusiyada, həm də İsraildə çapdan çıxmış “İsrailin xronikaları. Qəhrəmanlar kimə lazımdır?” ikicildliyi dərhal bestsellerə çevrilmişdir.
Vladimir Fromerin ölkəmizdə olduğu müddətdə Azərbaycandakı “Soxnut” Yəhudi Agentliyi onun İsrail dövlətinin tarixi, eləcə də Yaxın Şərqdə indiki ictimai-siyasi vəziyyət haqqında silsilə mühazirələrini təşkil etmək niyyətindədir. Bu mühazirələrlə o, ölkəmizdəki yəhudi diasporunun nümayəndələri, Bakı və Sumqayıtın gəncləri və tələbələri ilə görüşlərdə də çıxış edəcəkdir.
Bölmənin digər xəbərləri
