İSTİFADƏ OLUNMAMIŞ MƏZUNİYYƏTLƏRƏ GÖRƏ PUL ƏVƏZİ YENİ QAYDADA ÖDƏNİLƏCƏKDİR
Konstitusiyanın 130-cu maddəsinin 4-cü hissəsinə müvafiq olaraq, xüsusi Konstitusiya icraatı üzrə noyabrın 29-da Konstitusiya Məhkəməsində açıq məhkəmə iclası keçirilmişdir. İclasda “Əmək Məcəlləsi”nin 144-cü maddəsinin 2-ci hissəsinin şərh edilməsinə dair Ali Məhkəmənin sorğusu ilə bağlı işə baxılmışdır.
Konstitusiya Məhkəməsinin sədri Xanlar Hacıyev gündəliyə çıxarılan məsələnin mahiyyəti barədə iştirakçılara məlumat verdi, Konstitusiya Məhkəməsinin hakimi Fikrət Babayev gündəliklə bağlı məruzə etdi. Məhkəmə iclasında maraqlı tərəflərin qanuni nümayəndələrinin, Ali Məhkəmənin hakimi Bağır Əsədovun, Milli Məclisin şöbə müdirinin müavini İmadəddin Əbdüləzizovun, ekspertlərin, mütəxəssislərin fikirləri, mülahizələri dinlənildi.
Konstitusiya Məhkəməsindən AZƏRTAC-ın müxbirinə bildirmişlər ki, məsələnin ətraflı mükakirəsindən sonra qərara alındı ki, əmək müqaviləsinə xitam verilərkən, 1999-cu il iyulun 1-dək istifadə olunmamış məzuniyyətlərə görə pul əvəzi həmin dövrdə qüvvədə olan qanunvericiliklə, həmin tarixdən sonra istifadə olunmamış məzuniyyətlərə görə pul əvəzi isə qüvvədə olan “Əmək Məcəlləsi”nin 144-cü maddəsinin 2-ci hissəsinə müvafiq olaraq ödənilməlidir.
Bölmənin digər xəbərləri
