İsveç ilk dəfə NATO-nun nüvə təlimlərində iştirak edir
Stokholm, 18 oktyabr, Nərgiz Cəfərli, AZƏRTAC
İsveç ilk dəfə olaraq NATO-nun Şimal dənizi üzərində və Avropanın şimal-qərbində keçirilən “Steadfast Noon” adlı illik nüvə təlimlərinə qoşulub.
AZƏRTAC xəbər verir ki, bu manevrlər çərçivəsində İsveçin “JAS Gripen” qırıcı təyyarələri ABŞ və Böyük Britaniyanın nüvə silahlarının müdafiəsinə dair əməliyyatlarda iştirak edir.
İsveç Silahlı Qüvvələrinin yaydığı məlumatda bildirilir ki, bu kimi təlimlər alyansın kollektiv təhlükəsizlik sistemini gücləndirir. Bununla belə, İsveç hərbi rəhbərliyi yalnız yazılı bəyanatla kifayətlənib və mətbuata müsahibə verməkdən imtina edib.
Stokholm Beynəlxalq Sülh Araşdırmaları İnstitutunun (SIPRI) eksperti Barbara Kunzun fikrincə, İsveçin bu təlimlərə qoşulması hərbi baxımdan deyil, daha çox simvolik və siyasi əhəmiyyət daşıyır. Onun sözlərinə görə, bu addım NATO-nun qətiyyətini nümayiş etdirmək və Rusiyaya alyansın hazır vəziyyətdə olduğunu göstərmək məqsədi güdür.
Qeyd edək ki, “Steadfast Noon” manevrləri həm Vaşinqtonda, həm də Moskvada nüvə arsenalının modernləşdirildiyi bir dövrdə keçirilir. Rusiya hazırda öz nüvə sistemlərini yeniləməklə yanaşı, Belarus ərazisində nüvə silahlarının yerləşdirilməsi barədə razılıq əldə edib. NATO isə təlimlərin heç bir konkret ölkəyə qarşı yönəlmədiyini və sırf müdafiə xarakteri daşıdığını vurğulayıb.
Bölmənin digər xəbərləri
