İtaliya Xarici İşlər Nazirliyində Cənubi Qafqaz, o cümlədən Azərbaycan ilə əlaqələri həyata keçirən F.Kruçianellini yeni vəzifəyə təyin olunması və İtaliya komandasının futbol üzrə dünya çempionu adına layiq görülməsi münasibətilə təbrik edən səfir E.Kərimov, Azərbaycandakı çoxsaylı azarkeşlərinin də bu uğura sevindiklərini diqqətə çatdırmışdır. O, həmçinin Azərbaycan Prezidenti İlham Əliyevin İtaliya Prezidenti Corcio Napolitanonu və Nazirlər Şurasının sədri Romano Prodini, eləcə də Azərbaycanın xarici işlər naziri Elmar Məmmədyarovun italiyalı həmkarı Massimo D'Alemanı bu münasibətlə təbrik etdiklərini yada salmışdır.

Təbriklərə görə təşəkkür edən F.Kruçianelli hadisədən sonra ilk iş günü Azərbaycan səfiri ilə görüşündən məmnunluğunu bildirmişdir.

E.Kərimov ölkələrimiz arasında münasibətlərin yüksələn xətlə inkişaf etdiyini bildirərək, bütün sahələrdə əlaqələrin dərinləşdirilməsi üçün geniş imkanların mövcudluğunu vurğulamışdır.

2005-ci ilin əlaqələrimizin inkişafında əlamətdar hadisələrlə yadda qaldığını bildirən səfir, Azərbaycan Prezidenti İlham Əliyevin İtaliyaya rəsmi səfərinin uğurları haqqında məlumat vermişdir.

İtaliyanın respublikamızın ən iri ticarət tərəfdaşı olduğunu bildirən səfir, İtaliyanın “Edison” şirkətinin Azərbaycanda qaz sektoruna maraq göstərdiyini demişdir. O, qeyri-neft sektorunda da əməkdaşlıq üçün böyük imkanların mövcudluğunu vurğulayaraq, “Tecnimont”, “Fincantieri” kimi iri şirkətlərin ölkəmizə olan marağını diqqətə çatdırmışdır.

İkitərəfli iqtisadi əməkdaşlığın inkişafı üçün 2004-cü ildə imzalanmış “İqtisadi əlaqələrə dair məşvərət forumunun yaradılması haqqında Memorandum”a uyğun olaraq, hər iki tərəfdən foruma sədrlərin təyin edilməsinin, habelə forumun ilk toplantısının keçirilməsinin əhəmiyyəti vurğulanmışdır.

Əməkdaşlıq çərçivəsində İtaliya tərəfindən ölkəmizə göstərilən texniki və humanitar yardımlara görə təşəkkürünü bildirərən E.Kərimov, İtaliyada hökumət dəyişikliklərindən sonra ölkələrimizin rəhbərlikləri arasında siyasi dialoqun təşkilinin əhəmiyyətli olduğunu vurğulamış, bu istiqamətdə ilk addım kimi XİN-lərarası məsləhətləşmələrin aparılmasının məqsədəuyğunluğunu diqqətə çarpdırmışdır. Bu mənada qarşılıqlı səfərlərin səmərəli olacağı vurğulanmışdır.

Ölkələrimiz arasında münasibətlərin yüksək səviyyəsinə toxunan F.Kruçianelli, əlaqələrin daha da möhkəmləndirilməsi üçün geniş imkanlardan söz açmışdır. O, Azərbaycanın dünya siyasətinin diqqət mərkəzində olan əhəmiyyətli regionda yerləşdiyini, ölkəmizin zəngin təbii sərvətlərə, böyük iqtisadi potensiala malik olduğunu vurğulayaraq, İtaliyanın Azərbaycan ilə əməkdaşlığın genişləndirilməsinə maraqlı olduğunu bildirmişdir. Xüsusilə, də enerji sektorundakı səmərəli əməkdaşlıqdan məmnunluğunu qeyd edən italiyalı diplomat, digər sahələrdə də əməkdaşlığın genişləndirilməsində ölkəsinin maraqlı olduğunu bildirmişdir.

Məşvərət forumunun yaradılmasının əhəmiyyətli olduğunu vurğulayan F.Kruçianelli, İtaliya tərəfinin yaxın zamanlarda bu işlə ciddi məşğul olacağını demiş, Azərbaycanda hüquqi dövlət quruculuğu, demokratiyanın inkişafı prosesinə İtaliyanın töhfə vermək niyyətini diqqətə çatdırmışdır.

X X X

Səfir E.Kərimov Azərbaycanda həyata keçirilən demokratik islahatlar, iqtisadi inkişaf və əhalinin sosial rifahının yaxşılaşdırılması istiqamətində aparılan siyasət barədə ətraflı məlumat vermiş, Ermənistanın Azərbaycana qarşı təcavüzkar siyasətinin regionun inkişafına mane olduğunu bildirmişdir.

Ermənistanın təcavüzü nəticəsində Azərbaycan ərazisinin 20 faizinin işğal olunması, bu ərazilərdə etnik təmizləmə siyasəti aparılması, bir milyondan çox soydaşımızın qaçqın və məcburi köçkün vəziyyətinə düşməsi, habelə bütün bunların Qafqazda regional əməkdaşlığa və təhlükəsizliyə böyük təhdid yaratması italiyalı diplomatın diqqətinə çatdırılmışdır.

E.Kərimov Azərbaycanın ərazi bütövlüyünü daim dəstəklədiyinə görə İtaliya tərəfinə təşəkkür etmişdir.

Münaqişənin həlli ilə bağlı aparılan danışıqlar prosesindən söz açan səfir, Azərbaycan tərəfinin bu münaqişənin beynəlxalq hüququn norma və prinsipləri əsasında ölkəmizin ərazi bütövlüyü çərçivəsində həllinə tərəfdar olduğunu bildirmişdir.

Görüşdə işğal edilmiş ərazilərdə ermənilərin qeyri-qanuni məskunlaşdırılması siyasətinin həyata keçirildiyi, Azərbaycanın tarixi-mədəni abidələrinin dağıdıldığı, eləcə də erməni silahlılarının həmin ərazilərdə kütləvi yanğınlar törətdiyi diqqətə çatdırılmış, bütün bunların danışıqlar prosesinə mənfi təsir göstərdiyi vurğulanmışdır.

Səfir E.Kərimov Romanın “Fori İmperiali” küçəsindəki divarda Roma imperiyasının müxtəlif tarixi dövrlərinə aid xəritələrdə Azərbaycanın yerləşdiyi coğrafi ərazinin üzərində Ermənistan adının yazılmasının ciddi səhv olduğunu diqqətə çatdırmış, həmin xəritəyə müvafiq dəyişikliklər edilməsinə ehtiyac duyulduğunu söyləmişdir. Məsələ ilə bağlı Roma şəhər meriyasına səfirlik tərəfindən müraciət olunsa da, bu məsələdə hələ ki, nəticə əldə edilmədiyi bildirilmişdir.

E.Kərimov ehtiyac yaranarsa, səfirlik tərəfindən həmin tarixi dövrlərdə regionda mövcud olan dövlətlərin ərazilərinə dair xəritələr və digər materialların təmin edilməsinin mümkünlüyünü vurğulamış, həmçinin bu məsələ ilə bağlı tarixçilərin iştırakı ilə birgə tədbirin keçirilməsinin də məqsədəuyğunluğunu diqqətə çatdırmışdır.

Dağlıq Qarabağ münaqişəsinin indiyədək həll edilməməsindən təəssüfləndiyini bildirən F.Kruçianelli, ölkəsinin münaqişənin sülh yolu ilə həllinə dəstək göstərməyə hazır olduğunu vurğulamış, Cənubi Qafqazdakı münaqişələrin regionda sabitliyə və təhlükəsizliyə böyük təhdid olduğunu bidirmişdir. O, Avropa İttifaqının bu münaqişələrin həllinə daha fəal cəlb edilməsinin məqsədəuyğunluğunu vuğulamışdır.

“Forİ İmperiali” küçəsindəki xəritələrdə coğrafi adlarla əlaqədar məsələ ilə tanış olmadığını bildirən F.Kruçianelli, bununla bağlı ətraflı və dəqiq araşdırmaya ehtiyac duyulduğunu söyləmişdir.

İtaliyalı diplomat həmin xəritədə coğrafi ərazinin bu və ya digər adla adlandırılmasının hər hansı məqsəd daşımadığına inandığını bildirmişdir. Məsələnin dərindən araşdırılacağını bir daha vurğulayan F.Kruçianelli, bu barədə səfırliyə məlumat veriləcəyini qeyd etmişdir.

O, iş cədvəlinin gərgin olmasına baxmayaraq, tanışlıq və cari məsələlərin müzakirəsi üçün Azərbaycana səfər etməyə maraqlı olduğunu bildirmiş, münasib vaxtda səfərin gerçəkləşdiriləcəyini söyləmişdir.