İtaliyada daşqınlar 300 milyon avro ziyana səbəb olub
Roma, 7 noyabr, AZƏRTAC
İtaliyanın Toskana regionunda leysan yağışları və daşqınların vurduğu zərər 300 milyon avro qiymətləndirilir.
AZƏRTAC xəbər verir ki, bunu regionun rəhbəri Eucenio Ciani deyib.
O bildirib ki, hazırda zərərin hesablanması aparılır. İlkin hesablamaya görə, dövlət və özəl sektorlara dəyən ziyan 300 milyon təşkil edəcək. Lakin bu, təxmini rəqəmdir. Daha dəqiq hesablamalar üçün ən azı bir həftə vaxt lazımdır. Təkcə Sib çimərlik kurortunun müəssisələrinə dəymiş ziyan 100 milyon avrodan çoxdur.
İtaliya Baş nazirinin müavini, xarici işlər və beynəlxalq əməkdaşlıq naziri Antonio Tayani isə deyib ki, daşqınların ziyan vurduğu regionlarda məhsul ixrac edən şirkətlərə dövlət tərəfindən ümumilikdə 100 milyon avro geri qaytarılmayan vəsait veriləcək. Əlavə olaraq daha 200 milyon avro subsidiyalaşdırılmış kreditin verilməsi də nəzərdə tutulur.
Mülki müdafiə qrupları fövqəladə vəziyyətin başlanğıcından bəri ümumilikdə 4750-dən çox əməliyyat keçirib.
Təbii fəlakət nəticəsində itkin düşmüş daha bir nəfərin cəsədi tapılıb. Bununla da ölənlərin sayı 7-yə çatıb. Həmçinin itkin düşən yanğınsöndürənin cəsədi də tapılıb.
Regionda zərər çəkmiş ailələrə yardım məqsədilə ianələrin toplanması üçün bank hesabı açılıb. Bölgədən ümumilikdə 1200 nəfər təxliyə edilib.
AZƏRTAC-ın xüsusi müxbiri
Roma
Bölmənin digər xəbərləri
