KAMERA ORKESTRİ SUMQAYITDA ÇIXIŞ ETMİŞDİR
Orkestrin rəhbəri, xalq artisti Teymur Göyçayev AZƏRTAC-ın müxbirinə bildirmişdir ki, bayramlarda sumqayıtlılar qarşısında çıxış etməyimiz xoş ənənəyə çevrilmişdir. Musiqini duyan, həvəslə dinləyən Sumqayıt tamaşaçısı bizim çox xoşumuza gəlir. Bu, həm də şəhər əhalisinin asudə vaxtının təşkilinə və estetik zövqünün inkişafına xüsusi diqqət yetirən Sumqayıt rəhbərliyinin xidmətidir.
Bayram konsertində Azərbaycan bəstəkarları Üzeyir Hacıbəyov, Qara Qarayev, Fikrət Əmirov, Süleyman Ələsgərov, Aqşin Əlizadə və Nazim Əliverdibəyovun, habelə Qərb musiqisinin klassikləri Vivaldi, Motsart, Kreysler, Brams və başqalarının əsərləri səslənmişdir.
Dinləyicilər Bakı Musiqi Akademiyasının tələbəsi, xalq artisti, professor Xuraman Qasımovanın şagirdi Nurlana Babayevanın çıxışını da rəğbətlə qarşılamışlar. Vokalçı Azərbaycan və Neapol xalq mahnılarını ifa etmişdir. Milli Konservatoriyanın magistri tarzən Rüfət Həsənovun gözəl ifası da sumqayıtlıların ürəyincə olmuşdur.
Orkestrin virtuoz ifa tərzi, maraqlı repertuarı gözəl bayram əhval-ruhiyyəsi yaratmışdır. Şəhər icra hakimiyyətinin başçısı Vaqif Əliyev toplaşanları Yeni il münasibətilə təbrik edərək, ümidvar olduğunu bildirmişdir ki, 2006-cı il də yeni zəfərlərlə əlamətdar olacaqdır. Sumqayıtlılar ümummilli liderimiz Heydər Əliyevin Prezident İlham Əliyev tərəfindən uğurla davam etdirilən siyasi xəttinə bundan sonra da sadiq qalacaqlar.
Bölmənin digər xəbərləri
