KANADADA AZƏRBAYCAN MƏDƏNİYYƏTİNİ TƏBLİĞ EDƏN “FOLKLOR KURSU” YARADILMIŞDIR
Kanadada fəaliyyət göstərən Azərbaycan Təhsil və Mədəniyyət Mərkəzindən AZƏRTAC-a bildirmişlər ki, qurum milli mədəniyyətimizin, mənəvi dəyərlərimizin qorunması və təbliği istiqamətində xeyli iş görür. Mərkəzin nəzdində “Folklor kursu” yaradılmışdır. Kursun əsas məqsədi bu ölkədə yaşayan soydaşlarımızın doğma vətəni ilə əlaqələrini daha da möhkəmləndirmək, Azərbaycan milli musiqisini, mədəniyyətini təbliğ etməkdir. Mərkəzdə Azərbaycanın milli musiqi və rəqsləri, ədəbiyyatı azərbaycanlı uşaqlara, eləcə də mədəniyyətimizə maraq göstərən kanadalılara öyrədiləcəkdir.
Kursun yaradılmasında yaxından iştirak etmiş soydaşlarımız Malik Ağayev, Elbəy Babazadə bildirmişlər ki, yaxın gələcəkdə incəsənətin digər sahələrinə dair də dərnəklər yaradılacaqdır. Bununla əlaqədar, Azərbaycan Təhsil və Mədəniyyət Mərkəzinin ağsaqqallar şurasının sədri Zeynalabdin Zeynalov, üzvlər İbrahim Əliyev, Sənan Abbasov məsləhətləşmələr aparırlar.
Mərkəzin üzvləri bu işdə göstərdiyi köməkliyə görə, Azərbaycanın Kanadadakı səfiri Fəxrəddin Qurbanova minnətdarlıqlarını bildirmişlər.
Bölmənin digər xəbərləri
