KANOEÇİLƏR BOLQARISTANDA TƏLİM-MƏŞQ TOPLANIŞI KEÇİRƏCƏKLƏR
Bakı, 1 dekabr (AZƏRTAC). Kanoe qayıqlarında avarçəkmə üzrə Azərbaycan milli komandası dekabrın 8-də Bolqarıstana təlim-məşq toplanışına yollanacaqdır. Yığmanın baş məşqçisi Aleksandr Kolıbelnikov toplanışa Maksim Prokopenkonu, Sergey Bezuqlını və Andrey Kraytoru aparacaqdır.
Azərbaycan Milli Avarçəkmə Federasiyasından bildirmişlər ki, hazırlıq prosesi üçün Bilmiken kurort bazası seçilmişdir. Dəniz səviyyəsindən 2000 metr hündürlükdə olan bu bazada kanoeçilər fiziki hazırlıq səviyyələrinin yüksəldilməsi istiqamətində müxtəlif tapşırıqları yerinə yetirəcəklər. Toplanış dekabrın 29-dək davam edəcəkdir.
Azərbaycan Milli Avarçəkmə Federasiyası qış aylarında avarçəkənlərimizin fiziki hazırlıq səviyyələrini artırması istiqamətində əlverişli məkanlarda təlim-məşq toplanışında iştirakına xüsusi önəm verir. Bu da avarçəkmənin, ilk növbədə yüksək fiziki hazırlıq, dözümlülük tələb edən idman növlərindən olması ilə əlaqədardır. Belə ki, gələn ilin yanvarında bir qrup avarçəkənimizin Almaniyada toplanışda iştirakı nəzərdə tutulmuşdur.
Bölmənin digər xəbərləri
