Balakən rayonunun Katex kənd bələdiyyəsi əhalinin içməli su ilə təminatını daha da yaxşılaşdırmaq üçün yararsız vəziyyətdə olan su kəmərində daxili imkanlar hesabına əsaslı təmir və bərpa işləri aparır. Kənd bələdiyyəsinin sədri Cavanşir Piriyev
AZƏRTAC-ın müxbirinə bildirmişdir ki, aparılan təmir və bərpa işləri artıq başa çatmaq üzrədir və hazırda kəndin daxilində ayrı-ayrı məhəllələrə, evlərə su xətləri çəkilir. Bərpa işinə 90 milyon manata yaxın vəsait xərclənmişdir. Kəmərin istifadəyə verilməsi nəticəsində 8 min nəfərə yaxın əhalinin yaşadığı Katex kəndində suvarma və içməli su problemi birdəfəlik həll olunacaqdır.
Katex bələdiyyəsi kəndin digər sosial problemlərinin həllində də daim yaxından iştirak edir. Cari ilin ötən dövrü ərzində bələdiyyənin daxili imkanları hesabına kənddə geniş abadlıq işləri aparılmış, yeni iş yerləri açılmış, iki orta məktəb binası əsaslı təmir olunmuş, kəndarası yollara asfalt döşənmiş, sosial müdafiəyə ehtiyacı olan sakinlərə yardımlar verilmişdir.
