Keçən ay İqtisadiyyat Nazirliyinin Çağrı mərkəzinə 8300-dən çox müraciət ünvanlanıb
Bakı, 5 may, AZƏRTAC
Apreldə İqtisadiyyat Nazirliyinin Çağrı mərkəzinə 8300-dən çox müraciət olub.
Nazirlikdən AZƏRTAC-a bildirilib ki, “195-2” Çağrı mərkəzinə daxil olan müraciətlər əsasən, ölkəmizdə pandemiyadan zərərçəkmiş sahibkarlara dövlətin maliyyə-iqtisadi dəstək tədbirləri, nəzərdə tutulan vergi güzəştləri və tətilləri, tibbi maska və spirtlə təminat, lisenziyaların verilməsi, güzəştli kreditlərin alınması mexanizmi, investisiya təşviqi və təsdiqedici sənədlərin alınması, həmçinin İqtisadiyyat Nazirliyinin səlahiyyətlərinə və fəaliyyət istiqamətlərinə dair digər məsələləri əhatə edib.
Keçən ilin aprelində “195-2” Çağrı mərkəzinə 1884 müraciət olduğu halda, bu ilin eyni ayı üzrə 4 dəfədən çox - 8322 müraciət olub.
Çağrı mərkəzinə daxil olmuş müraciətlərin əksər hissəsi operativ şəkildə cavablandırılıb, araşdırma tələb edən müraciətlər isə nazirliyin aidiyyəti strukturları tərəfindən araşdırılmaqla qanunvericiliyə uyğun tədbirlər görülüb və müraciət edən şəxslərə cavab verilib.
Bölmənin digər xəbərləri
