“Kimya problemləri” jurnalı SJR reytinqində Q3 kateqoriyasında yer alıb
Bakı, 17 aprel, AZƏRTAC
“Elsevier”in “Scopus” bazasındakı məlumatlara əsaslanaraq elmi jurnalları, ölkələri və tədqiqat qurumlarını reytinqə salan “SCImago Journal & Country Rank” (SJR) açıq elmmetrik portalı 2025-ci il üçün jurnalların qiymətləndirmə nəticələrini elan edib. Nəticələrə əsasən “Chemical Problems” jurnalı 1 səviyyə yüksələrək Q3 kateqoriyasında yer alıb.
Bu barədə AZƏRTAC-a Elm və Təhsil Nazirliyinin Kimya İnstitutundan məlumat verilib.
“Kimya problemləri” (“Chemical Problems”) jurnalında (www.chemprob.org) indiyə qədər 2350-dən artıq elmi məqalə dərc olunub.
Jurnal 2009-cu ildən “Chemical Abstract” elmi informasiya bazasında referatlaşdırılır. Jurnal dövrü nəşrlərin beynəlxalq qeydiyyat mərkəzində qeydiyyatdan keçib, 2221-8688 (print) və 2522-1655 (online) ISSN indeksini alıb. Bundan başqa, bir çox nüfuzlu biblioqrafik, referativ bazalarda, repozitariyalarda və axtarış sistemlərində yerləşdirilib. 2016-cı il (№ 1) – 2019-cu il (№ 3) daxil olmaqla, jurnalda dərc edilən elmi məqalələr “Web of Science” bazasında indeksləşdirilib və 2018-ci ildən rəqəmsal axtarış sistemi üçün “Crossref”də qeydiyyatdan keçərək DOI alıb.
2021-ci ilin sentyabr ayından jurnal “Scopus” beynəlxalq indeksləşmə bazasına daxil edilib.
“Chemical Problems” jurnalı Azərbaycan Respublikası Prezidenti yanında Ali Attestasiya Komissiyasının təsdiq etdiyi beynəlxalq nüfuzlu elmi bazalara daxil olan tövsiyyə olunan jurnallar siyahısına daxildir.
Bölmənin digər xəbərləri
