Kitab sərgisində məktəblilərdən maraqlı təqdimat
Bakı, 14 noyabr, AZƏRTAC
Paytaxt məktəbliləri IX Bakı Beynəlxalq Kitab Sərgisində maraqlı təqdimatla çıxış ediblər.
Bu barədə AZƏRTAC-a Bakı Şəhəri üzrə Təhsil İdarəsindən məlumat verilib. Bildirilib ki, Bakıdakı 124 nömrəli tam orta məktəbin ibtidai sinif müəllimi Sənubər Əliyeva və III sinif şagirdlərinin iştirakı ilə nümayiş olunan təqdimat uşaq yazıçısı Sevinc Nuruqızının “Duman pəriləri ŞU-ŞA” kitabının motivləri əsasında hazırlanıb.
Təqdimatın əsas məqsədi məktəblilərin Vətənə məhəbbət ruhunda tərbiyəsini tərənnüm etmək, onlarda vətənpərvərlik, torpağa bağlılıq hissini gücləndirmək, Qarabağın tacı olan Şuşanı gənc nəsillərə tanıtmaq, həmçinin şagirdlərin mütaliəyə marağını artırmaqdan ibarətdir. Təqdimat zamanı şagirdlər tərəfindən Şuşanın azadlığa qovuşması, qədim tarixi, mədəniyyət abidələri, tarixi şəxsiyyətləri haqqında səhnəcik nümayiş etdirilib.
Tədbirdə şagirdlərin rəqs kompozisiyaları da maraqla qarşılanıb.
Bölmənin digər xəbərləri
