KİTABXANALAR İNFORMASİYA MƏRKƏZLƏRİNƏ ÇEVRİLİR
Azərbaycanda 12 min kitabxana var, ancaq onların heç də hamısı müvafiq tələblərə və beynəlxalq standartlara cavab vermir. AZƏRTAC xəbər verir ki, bunu mədəniyyət və turizm naziri Əbülfəs Qarayev nazirlik və ABŞ-ın ölkəmizdəki səfirliyi arasında kitabxana sahəsində əməkdaşlıq haqqında memorandumun imzalanması mərasimində bildirmişdir.
Onun sözlərinə görə, kitabxanalarda islahatlar aparılması ilə bağlı layihənin son variantı Nazirlər Kabineti tərəfindən artıq təsdiq edilmişdir. Hazırda müvafiq dövlət qurumları ilə danışıqlar aparılır və cari ilin ikinci yarısından layihə ilə bağlı işlər başlanacaqdır. Ə.Qarayev demişdir: “Biz planda nəzərdə tutulan müddəti gözləmirik. Bakıda və ölkənin müxtəlif rayonlarında işlər artıq görülür, yerlərdə kitabxanalar bərpa edilir, onların maddi-texniki bazası möhkəmləndirilir. Kitabxanalar, zamanın tələbinə uyğun olaraq, kitabxana-informasiya mərkəzlərinə çevrilir”.
Tam yararsız vəziyyətə düşmüş, oxucusunu itirmiş, real fayda verməyən kitabxanalar isə bağlanacaqdır. Lakin onların itirilməmiş potensialından gələcəkdə istifadə olunacaqdır.
Bölmənin digər xəbərləri
