“Kontrafakt məhsulların müəyyən edilməsi” mövzusunda seminar keçirilib
Bakı, 29 dekabr, AZƏRTAC
Dekabrın 29-da Dövlət Gömrük Komitəsinin əməkdaşları üçün “Kontrafakt məhsulların müəyyən edilməsi” mövzusunda onlayn seminar keçirilib. Əqli mülkiyyət sahəsində ixtisaslaşan “Schmitt & Orlov İntellectual Property” beynəlxalq şirkəti tərəfindən keçirilən seminarda Dövlət Gömrük Komitəsinin aidiyyəti qurumlarının 20-dən çox əməkdaşı iştirak edib.
Komitənin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, seminarın açılışında Dövlət Gömrük Komitəsi sədrinin müavini, gömrük xidməti general-mayoru Cavad Qasımov Vətən müharibəsində ölkəmizin qələbəsindən danışıb və vurğulayıb ki, Azərbaycan Ordusunun bərqərar etdiyi tarixi ədalət, həm də regional inkişafın sürətlənməsinə münbit şərait yaradacaq.
C.Qasımov Dövlət Gömrük Komitəsinin əqli mülkiyyət hüquqlarının qorunmasına xüsusi önəm verdiyini bildirib, bu sahədə qanunvericilik bazasının işlənib hazırlanması, əməkdaşların potensialının gücləndirilməsi və atılan digər addımlar barədə məlumat verib, seminarın faydalı olacağına əminliyini ifadə edib.
Daha sonra “Schmitt & Orlov İntellectual Property” beynəlxalq şirkətinin nümayəndələri tərəfindən əqli mülkiyyət hüquqlarının qorunması ilə bağlı beynəlxalq brendlərin nümunələri əsasında xüsusi təqdimatlar nümayiş etdirilib və iştirakçıları maraqlandıran suallar ətraflı cavablandırılıb.
Bölmənin digər xəbərləri
